పోలవరం-బనకచర్ల (Polavaram-Banakacharla) ప్రాజెక్టు (Project)పై తెలంగాణ (Telangana) ముఖ్య‌మంత్రి (Chief Minister) రేవంత్‌రెడ్డి (Revanth Reddy) సంచ‌ల‌న వ్యాఖ్యలు చేశారు. ఢిల్లీ (Delhi) ప‌ర్య‌ట‌న‌లో ఉన్న ఆయన మీడియాతో చిట్‌చాట్ నిర్వ‌హించి కీల‌క కామెంట్స్ చేశారు. ఆంధ్రప్రదేశ్ ప్రభుత్వం (Andhra Pradesh Government)తో చర్చలకు సిద్ధమని ప్రకటించారు. ఈనెల 23న క్యాబినెట్ సమావేశం (Cabinet Meeting)లో ఈ అంశంపై చర్చిస్తామని, అవసరమైతే ఏపీ సీఎం (AP CM) చంద్రబాబు నాయుడు (Chandrababu Naidu)తో చర్చలకు తామే ముందడుగు వేస్తామని తెలిపారు. గోదావరి నదిలో తెలంగాణకు కేటాయించిన 968 టీఎంసీ నీటి వినియోగానికి సంబంధించిన ప్రాజెక్టులకు అనుమతులు పెండింగ్‌లో ఉన్నాయని, ముందుగా వీటికి ఆమోదం లభించాలని చంద్రబాబును కోరారు. తెలంగాణతో చర్చలు లేకుండా, సాంకేతిక కమిటీ, అధికారుల కమిటీ, అపెక్స్ కౌన్సిల్‌లో చర్చ జరపకుండా కేంద్రం నుంచి బనకచర్ల ప్రాజెక్టుకు అనుమతులు కోరడం సరికాదని ఆయన విమర్శించారు.
కృష్ణా నది (Krishna River) నీటి విభజన (Water Allocation)లో తెలంగాణకు అన్యాయం జరిగిందని, దీనికి బీఆర్ఎస్(BRS) నాయకత్వమే కారణమని ఆరోపించారు సీఎం రేవంత్‌రెడ్డి. 2016లో అపెక్స్ కౌన్సిల్ సమావేశంలో మాజీ సీఎం కేసీఆర్(KCR), నీటిపారుదల శాఖ మాజీ మంత్రి హరీష్ రావు కృష్ణా నదిలో 555 టీఎంసీలకు బదులు 299 టీఎంసీలకే ఒప్పుకున్నారని, దీనివల్ల తెలంగాణకు నష్టం జరిగిందని విమర్శించారు. తెలంగాణకు కృష్ణా నదిలో 500 టీఎంసీల నీరు కేటాయించాలని తాము కోరుతున్నామని ఆయన తెలిపారు. బనకచర్ల ప్రాజెక్టు గోదావరి జలాలను కృష్ణా బేసిన్‌కు మళ్లిస్తుందని, ఇది గోదావరి జల వివాద ట్రైబ్యునల్ 1980, ఆంధ్రప్రదేశ్ పునర్వ్యవస్థీకరణ చట్టం 2014ను ఉల్లంఘిస్తుందని ఆయన ఆందోళన వ్యక్తం చేశారు.
బీఆర్ఎస్‌పై కూడా రేవంత్ రెడ్డి తీవ్ర విమర్శలు గుప్పించారు. “లోక్‌సభ ఎన్నికల్లో బీజేపీ(BJP)కి 8 సీట్లు గెలిపించడానికి బీఆర్ఎస్ అవయవ దానం చేసింది. బీఆర్ఎస్ చరిత్రలో తొలిసారిగా ఒక్క సీటు కూడా గెలవకపోవడం గమనార్హం,” అని ఆయన వ్యాఖ్యానించారు. తెలంగాణ జల హక్కులను కాపాడేందుకు రాజకీయాలకు అతీతంగా అన్ని పక్షాలను ఏకం చేస్తామని, జలశక్తి మంత్రి (Jal Shakti Minister) సీఆర్ పాటిల్‌ (CR Patil)ను కలిసేందుకు సన్నాహాలు చేస్తున్నామని ఆయన పేర్కొన్నారు.
