ఇంగ్లండ్‌(England)లోని నార్తంబర్ల్యాండ్ (Northumberland) ప్రాంతంలో ఉన్న ‘ది పాయిజన్ గార్డెన్’ (The Poison Garden) ప్రపంచంలోనే అత్యంత ప్రమాదకరమైన తోటగా పేరుగాంచింది. సాధారణంగా తోటల్లో పువ్వుల సుగంధం, పచ్చదనం, ప్రశాంతత నిండిన వాతావరణం ఉంటుంది. కానీ ఈ తోటలో మాత్రం మరణం దాగి ఉంటుంది. ఎందుకంటే ఇక్కడ 100కి పైగా విషపూరిత మొక్కలున్నాయి.
ఈ తోటలోకి ప్రవేశించాలంటే గైడ్ (Guide) అనుమతి తప్పనిసరి. ఇక్కడ ఉన్న మొక్కలను తాకడం, వాసన చూడడం, రుచి చూడడం కఠినంగా నిషేధం. ఎందుకంటే చిన్న నిర్లక్ష్యం కూడా ప్రాణానికి ముప్పుగా మారవచ్చు. కొన్ని మొక్కలు కేవలం తాకినా ప్రమాదకరమైన రసాయనాలను విడుదల చేస్తాయి.
ఇక్కడ ఉన్న మాంక్‌షుడ్‌ (Monkshood), రిసిన్‌ (Ricin) వంటి మొక్కలు అత్యంత విషపూరితమైనవిగా గుర్తించబడ్డాయి. ఈ తోటను సందర్శించిన కొంతమంది పర్యాటకులు తలనొప్పి, మైకం వంటి సమస్యలను ఎదుర్కొన్న ఘటనలు కూడా ఉన్నాయి. అందుకే ఇక్కడ భద్రతా నియమాలు చాలా కఠినంగా అమలు చేస్తారు.
ప్రకృతిలోని అందం, భయం రెండూ కలిసిన అరుదైన ప్రదేశం ఈ పాయిజన్ గార్డెన్. ఒక్కసారి చూసేందుకు ప్రపంచ నలుమూలల నుంచి పర్యాటకులు ఇక్కడకు వస్తున్నారు. ఆ తోటలోని అందం వెనుక దాగి ఉన్న ప్రాణాంతక వాస్తవం ప్రతి సందర్శకుడికి గగుర్పొడిచే అనుభూతినే కలిగిస్తుంది.
