భార‌త వాతావరణ శాఖ ఆంధ్రప్రదేశ్ రాష్ట్రానికి కీల‌క ఆదేశాలు జారీ చేసింది. ఆంధ్రప్రదేశ్‌లోని ఎన్టీఆర్, ఏలూరు జిల్లాలకు భారీ నుంచి అత్యంత భారీ వర్షాలు కురిసే అవ‌కాశాలు ఉన్నాయ‌ని ఐఎండీ ఆరెంజ్ అలెర్ట్ జారీ చేసింది. రానున్న 24 గంటల్లో ఈ జిల్లాల్లో భారీ వర్షాలతో పాటు, కొన్ని ప్రాంతాల్లో అత్యంత భారీ వర్షపాతం నమోదయ్యే అవకాశం ఉందని ఐఎండీ తెలిపింది. అలాగే, బాపట్ల, కృష్ణ, గుంటూరు జిల్లాలకు ఎల్లో అలెర్ట్ జారీ చేయగా, రాష్ట్రవ్యాప్తంగా వచ్చే ఐదు రోజుల పాటు విస్తృత వర్షాలు కురిసే అవకాశం ఉందని వాతావరణ శాఖ పేర్కొంది.
పశ్చిమ మధ్య బంగాళాఖాతంలో ఏర్పడిన ఉపరితల ఆవర్తనం ఉత్తరాంధ్ర తీరానికి అనుకుని ఉండటం, రుతుపవనాల పురోగమనానికి అనుకూల వాతావరణం ఏర్పడటం వల్ల ఈ వర్షాలు కురుస్తున్నాయని ఐఎండీ వివరించింది. నిన్న (జూన్ 10) గుడివాడలో అత్యధికంగా 11 సెంటీమీటర్ల వర్షపాతం నమోదైంది. ఇతర ప్రాంతాల్లో కైకలూరు, మచిలీపట్టణంలో 7 సెం.మీ, ఏలూరులో 6 సెం.మీ, నూజివీడు, భీమడోలు, రేపల్లెలో 5 సెం.మీ, లేపాక్షిలో 4 సెం.మీ వర్షపాతం రికార్డైంది. ఈ వర్షాల కారణంగా రాష్ట్రంలోని అనేక ప్రాంతాల్లో రోడ్లు జలమయమై, రవాణా వ్యవస్థకు అంతరాయం ఏర్పడింది.
ఆంధ్రప్రదేశ్ రాష్ట్ర విపత్తు నిర్వహణ సంస్థ (ఏపీఎస్‌డీఎంఏ) అధికారులు ప్రజలను అప్రమత్తంగా ఉండాలని, ముఖ్యంగా తక్కువ ప్రాంతాల్లో నివసించే వారు జాగ్రత్తగా ఉండాలని సూచించారు. మత్స్యకారులు సముద్రంలోకి వెళ్లవద్దని, తీరప్రాంతాల్లో గంటకు 35-55 కి.మీ వేగంతో గాలులు వీచే అవకాశం ఉందని హెచ్చరించారు. ఎన్టీఆర్, ఏలూరు జిల్లాల్లో వరద ప్రభావిత ప్రాంతాల్లో సహాయక చర్యలను వేగవంతం చేయడానికి జిల్లా యంత్రాంగం సన్నద్ధమవుతోంది. రాష్ట్ర ప్రభుత్వం వాతావరణ సూచనలను నిశితంగా పరిశీలిస్తూ, అవసరమైన జాగ్రత్త చర్యలు తీసుకుంటోంది.
