తెలంగాణ బొగ్గు గని కార్మిక సంఘం (టీబీజీకేఎస్‌) గౌరవ అధ్యక్షురాలి పదవి నుంచి తొలగించడంపై ఎమ్మెల్సీ కవిత తీవ్రంగా స్పందించారు. ఈ విషయంపై ఆమె సింగరేణి కార్మికులకు బహిరంగ లేఖ రాశారు. కొత్తగా ఎన్నికైన టీబీజీకేఎస్‌ గౌరవ అధ్యక్షుడిగా కొప్పుల ఈశ్వర్‌కు శుభాకాంక్షలు తెలుపుతూనే, ఈ ఎన్నిక కార్మిక చట్టాలకు విరుద్ధంగా జరిగిందని ఆరోపించారు.
కవిత తన లేఖలో పేర్కొన్న ముఖ్య అంశాలు:
కుట్రలు, వేధింపులు: సింగరేణి కార్మికుల కోసం తాను పోరాడుతుంటే, కొందరు తనపై కుట్రలు పన్నుతున్నారని కవిత ఆరోపించారు. బీఆర్ఎస్ పార్టీలో జరుగుతున్న పరిణామాలు అందరికీ తెలుసని పేర్కొన్నారు.
కేసీఆర్‌కు రాసిన లేఖ లీక్: తాను గతంలో కేసీఆర్‌కు రాసిన ఒక లేఖను తాను అమెరికా పర్యటనలో ఉన్నప్పుడు లీక్ చేశారని కవిత వెల్లడించారు. ఆ కుట్రదారులు ఎవరో బయటపెట్టాలని తాను కోరితే, తనపైనే కక్ష కట్టారని సంచలన వ్యాఖ్యలు చేశారు. ఆ కుట్రదారులే వివిధ రూపాల్లో తనను వేధిస్తున్నారని ఆరోపించారు.
కార్మికులకు హామీ: టీబీజీకేఎస్‌ గౌరవ అధ్యక్షురాలిగా ఉన్నా, లేకపోయినా సింగరేణి కార్మికుల కుటుంబంలో ఒక సభ్యురాలిగా ఎల్లప్పుడూ వారికి అండగా ఉంటానని కవిత హామీ ఇచ్చారు. గతంలో తాను కార్మికుల సంక్షేమం కోసం చేసిన కృషిని, సాధించిన విజయాలను గుర్తు చేసుకున్నారు.
పదవుల తొలగింపు: తాను అమెరికాలో ఉన్న సమయంలోనే టీబీజీకేఎస్‌ సెంట్రల్ కమిటీ సమావేశం నిర్వహించి, కొత్త అధ్యక్షుడిని ప్రకటించారని, ఇది కార్మిక చట్టాలకు విరుద్ధమని స్పష్టం చేశారు.
