మీర్‌పేట్ మాధవి హత్య కేసులో మరో సంచలనం వెలుగులోకి వచ్చింది. నిందితుడు గురుమూర్తి ఒక్కడే హత్య చేయలేదని, అత‌నికి మరికొందరు సహకరించి ఉండొచ్చని పోలీసులు భావిస్తున్నారు. అందులో ఒక మహిళ కూడా ఉన్నట్లు అనుమానాలు వ్యక్తమవుతున్నాయి. సహకరించిన వారి వివరాలు సేకరించేందుకు పోలీసులు చర్యలు చేపట్టారు. అవసరమైతే, గురుమూర్తికి పాలీగ్రాఫ్ టెస్ట్ నిర్వహించేందుకు సిద్ధమవుతున్నారు.
కస్టడీలో గురుమూర్తి – విచారణ ముమ్మరం
ఈ కేసులో ప్రధాన నిందితుడైన గురుమూర్తిని శనివారం కస్టడీలోకి తీసుకున్నారు. ఇప్పటికే అతనిని రిమాండ్ చేసి జైలుకు తరలించిన సంగతి తెలిసిందే. పోలీసులు కస్టడీ పిటిషన్ దాఖలు చేసి విచారణ చేపట్టారు. సరూర్‌నగర్‌లోని సీసీఎస్ లేదా అబ్దుల్లాపూర్‌మెట్‌ పోలీస్ స్టేషన్‌లో విచారణ కొనసాగుతోంది. ఈనెల 12 వరకు విచారణ కొనసాగనుంది.
హత్యకు వెనుకున్న కారణాలు
ఏపీలోని ప్రకాశం జిల్లా రాచర్ల మండలం జేపీ చెరువుకు చెందిన పుట్ట గురుమూర్తి, వెంకట మాధవితో 13 ఏళ్ల క్రితం వివాహం జరిగింది. వీరికి ఇద్దరు పిల్లలున్నారు. గురుమూర్తి ఆర్మీలో సేవలు అందించి నాయక్‌ సుబేదార్‌గా రిటైరయ్యాడు. ప్రస్తుతం కంచన్‌బాగ్ డీఆర్‌డీఏలో భద్రతా సిబ్బందిగా పనిచేస్తున్నాడు. ఇటీవల అతను తన సమీప బంధువైన ఓ మహిళతో వివాహేతర సంబంధం పెట్టుకున్నట్లు సమాచారం. ఈ విషయం భార్యకు తెలియడంతో తరచూ గొడవలు జరిగేవి. భార్యను అడ్డు తొలగించుకోవాలనే ఉద్దేశంతోనే హత్యకు పాల్పడినట్లు అనుమానిస్తున్నారు.
మహిళ అదృశ్యం
నిందితుడి వాంగ్మూలాన్ని ఆధారంగా చేసుకుని దర్యాప్తు ముమ్మరంగా సాగుతోంది. మృతదేహాన్ని చెరువులో పడేశానని గురుమూర్తి చెబుతున్నా, అక్కడ నుంచి ఎలాంటి ఆధారాలు లభించలేదు. మృత‌దేహానికి సంబంధించిన ఆనవాళ్లు దొరికితే, వాటిని మాధవి పిల్లల డీఎన్‌ఏతో పోల్చే అవకాశం ఉంది. క్లూస్ టీం, ఫోరెన్సిక్ ల్యాబ్ నివేదిక కీలకంగా మారనున్నాయి. పోలీసులు ఇప్పటి వరకూ మాధవి ఇంట్లోకి వెళ్తున్న సీసీటీవీ దృశ్యాలను మాత్రమే గుర్తించారు. మిగిలిన ఆధారాల కోసం ఇంకా గాలిస్తున్నారు. ఈ హత్య కేసు మరిన్ని సంచలన విషయాలను బయటపెడుతుందా? అనేది చూడాలి.
