కమ్యూనిస్టు పార్టీ ఆఫ్ ఇండియా (మావోయిస్ట్)కి చెందిన మహారాష్ట్ర–మధ్యప్రదేశ్–ఛత్తీస్గఢ్ స్పెషల్ జోనల్ కమిటీ (MMC) ఇటీవల ఒక పత్రికా ప్రకటనను విడుదల చేసింది, ఇందులో వారు మూడు రాష్ట్రాల ముఖ్యమంత్రులకు శాంతి చర్చల కోసం ఆహ్వానం పలికారు. ఈ ప్రెస్ నోట్లో, 2026 జనవరి 1 నుండి ఒక నెల రోజుల పాటు “హత్యాబంద్” మరియు పోరాట విరామాన్ని అమలు చేయాలని మావోయిస్టులు నిర్ణయించారు.
ఈ విరామ సమయంలో ప్రభుత్వం చర్చలకు ముందుకు వస్తే, అడవి ప్రాంతాల్లోని సమస్యల పరిష్కార దిశగా చర్చలు జరపడానికి తాము సిద్ధంగా ఉన్నామని ప్రకటించారు. ముఖ్యమంత్రులు చర్చలకు ముందుకు రావాలని కోరుతూ, గతం (2022)లో తాము పోరాట విరామం ప్రకటించినా అప్పటి ప్రభుత్వాలు స్పందించలేదని గుర్తు చేశారు. ఈసారి ఆ తప్పు పునరావృతం కాకూడదని వారు ఆకాంక్షించారు.
ఈ చర్చలలో ముఖ్యంగా అడివాసీల భూమి హక్కులు, పోలీసుల దాడులు, అభివృద్ధి లోపం వంటి ప్రధాన సమస్యలపై ఓపెన్ డిబేట్లు, చర్చలు జరగాలని MMC డిమాండ్ చేసింది. ఎన్కౌంటర్ల పేరుతో నిరపరాధులు చనిపోవడం ఆగి, ఈ ఘటనలు నిలిచిపోతేనే శాంతి చర్చలు సార్థకం అవుతాయని మావోయిస్టులు స్పష్టం చేశారు. చర్చలు ఎప్పుడు, ఎక్కడ నిర్వహిస్తారో మూడు రాష్ట్రాల ముఖ్యమంత్రులు అధికారికంగా ప్రకటించాలని వారు కోరారు. సంప్రదింపుల కోసం డిసెంబర్ 1 నుండి జనవరి 1, 2026 వరకు ప్రతిరోజూ ఉదయం 11 నుంచి 11.15 మధ్య అందుబాటులో ఉండేలా ఒక ఫోన్ నంబర్ను కూడా విడుదల చేశారు. పోరాట విరామ సమయంలో ఇరువైపులా ఎలాంటి దాడులు, ప్రతిదాడులు జరగకూడదని, ఈ చారిత్రక నిర్ణయాన్ని అందరూ గౌరవించాలని మావోయిస్టులు విజ్ఞప్తి చేశారు.
