మహాకుంభమేళాలో ఎన్నో ఆశ్చర్యకరమైన సంఘటనలు చోటుచేసుకుంటున్నాయి. కోట్లాది మంది భక్తులు పుణ్య స్నానాలు చేయడానికి ఇక్కడకు చేరుకుంటున్నారు. సాధువులు, నాగ సాధువులు కూడా పెద్ద ఎత్తున హాజరవుతున్నారు. వారిలో కొందరు గతంలో తమ కుటుంబాలను వదిలేసి సన్యాస మార్గంలో ప్రవేశించినవారే. అయితే, ఆ కుటుంబ సభ్యులు మాత్రం ఏదో ఒకరోజు తమ ఆత్మీయులను తిరిగి కనుగొంటామన్న ఆశను వదలడం లేదు.
27 ఏళ్ల విరహం – కుంభమేళాలో
జార్ఖండ్‌లోని ఓ కుటుంబం కుంభమేళాకు వెళ్లింది. పుణ్య‌స్నానాలు ముగించుకుని పర్యటిస్తున్న సమయంలో, వారు ఓ అఘోరి బాబాను గమనించారు. అతని ముఖాన్ని ఎక్కడో చూసినట్టుందని అనిపించింది. అతను 27 ఏళ్ల కిందట అదృశ్యమైన వారి బంధువు గంగసాగర్ యాదవ్ అని గుర్తించారు.
ఆ విషయం గంగసాగర్‌కు తెలియనివ్వకుండా, వెంటనే జార్ఖండ్‌లోని అతని భార్యకు సమాచారం అందించారు. 27 ఏళ్ల క్రితం గంగసాగర్ తన భార్య, ఇద్దరు పిల్లలను వదిలేసి ఎక్కడికో వెళ్లిపోయాడు. ఆమె ఎంతో వెతికినా, పోలీస్ కేసులు పెట్టినా అతని ఆచూకీ తెలియలేదు. చివరికి, ఆమె పిల్లల్ని ఒంటరిగా పెంచాల్సి వచ్చింది.
భర్త కుంభమేళాలో అఘోరాగా ఉన్నాడన్న విషయం తెలిసిన వెంటనే, ఆమె పిల్లల్ని వెంటబెట్టుకుని అక్కడికి చేరుకుంది. బంధువుల సహాయంతో గంగసాగర్‌ను కనుగొని, అతనిని చూసిన క్షణమే ఆమె భావోద్వేగానికి గురై కన్నీటి పర్యంతమైంది.
