చంద్ర గ్ర‌హ‌ణం అంటే ఏంటో తెలుసా..? ఆ స‌మ‌యంలో ఈ పనులు చేయొద్దు

ఖగోళంలో (Astronomy) జరిగే అద్భుతాలలో చంద్ర గ్రహణం (Lunar Eclipse) ఒకటి. నేడు (మార్చి 3, 2026) సంభవిస్తున్న ఈ చంద్ర గ్రహణం గురించి, అసలు చంద్ర గ్రహణం అంటే ఏమిటి? అని తెలుసుకుందాం.. శాస్త్రీయంగా చెప్పాలంటే, సూర్యుడు (Sun), భూమి (Earth) మరియు చంద్రుడు (Moon) ఒకే సరళరేఖపైకి వచ్చినప్పుడు భూమి నీడ చంద్రునిపై పడటాన్ని చంద్ర గ్రహణం అంటారు. ఈ సమయంలో భూమి సూర్యుడికి, చంద్రుడికి మధ్యలో ఉంటుంది. ఇది ఎప్పుడూ పౌర్ణమి రోజున మాత్రమే సంభవిస్తుంది.

నేటి చంద్ర గ్రహణం.. ముఖ్య సమయాలు
నేడు ఏర్పడుతున్నది కేతుగ్రస్త గ్రస్తోదయ చంద్ర గ్రహణం (Total Lunar Eclipse at Moonrise). దీనిని ఆకాశంలో ఎరుపు రంగులో మెరిసే ‘బ్లడ్ మూన్’ (Blood Moon)గా కూడా పిలుస్తారు. చంద్ర గ్రహణం మధ్యాహ్నం 3:20 గంటలకు ప్రారంభం అవుతోంది. సాయంత్రం 4:34 నుండి 5:33 గంటల వరకు బ్లడ్ మూన్ సమయం అంటే చంద్రుడు ఎర్ర‌గా మారుతాడు. ఈ అద్బుతాన్ని భార‌తీయులు (Indians) సాయంత్రం 6:26 (చంద్రోదయం) నుండి 6:46 గంటల వరకు సుమారు 20 నిమిషాల పాటు వీక్షించ‌వ‌చ్చు అని శాస్త్ర‌వేత్త‌లు చెబుతున్నారు.

చంద్ర గ్రహణం సాయంత్రం 6:46 గంటలకు ముగుస్తోంది. పురాణాలు, జ్యోతిష్య శాస్త్రం (Astrology) ప్రకారం గ్రహణ సమయంలో కొన్ని నియమాలు పాటించడం మంచిదని పండితులు సూచిస్తున్నారు. గ్రహణ సమయంలో భగవంతుని నామస్మరణ లేదా గాయత్రీ మంత్రం జపించడం వల్ల శక్తి లభిస్తుందని నమ్ముతారు.

ఇంట్లోని ఆహార పదార్థాలు, నీరు, మరియు నిల్వ పచ్చళ్లపై దర్భలు (గడ్డి పరకలు) వేయాలి. ఇది గ్రహణ కిరణాల ప్రభావం ఆహారంపై పడకుండా చూస్తుందని నమ్మకం. గ్రహణం ముగిసిన తర్వాత (సాయంత్రం 6:46 గంటల అనంతరం) తలస్నానం చేసి ఇల్లు శుభ్రం చేసుకోవాలి. గ్రహణం విడిచిన తర్వాత పేదలకు బియ్యం లేదా పప్పు ధాన్యాలు దానం చేయడం శుభప్రదం అని పెద్ద‌లు చెబుతారు.

ఏం చేయకూడదు?
గ్రహణం పట్టడానికి 9 గంటల ముందు (సూతక కాలం) నుండి ఆహారం తీసుకోకపోవడం మంచిది. ముఖ్యంగా గ్రహణ సమయంలో భోజనం నిషిద్ధం. ఆరోగ్యవంతులు గ్రహణ సమయంలో నిద్రపోకూడదని పండితులు చెబుతారు. గ్రహణ సమయంలో దైవ విగ్రహాలను తాకడం లేదా ఇంట్లో పూజలు చేయడం ఆపాలి. అందుకే గ్రహణ సమయంలో దేవాలయాలు మూసివేస్తారు.

గర్భిణీ స్త్రీలకు సూచనలు
గర్భిణీలు గ్రహణ సమయంలో బయట తిరగకుండా ఇంట్లోనే ఉండటం మంచిది. పదునైన వస్తువులు (కత్తులు, కత్తెర్లు) వాడకూడదని పెద్దలు సూచిస్తారు. అయితే, ఇది కేవలం నమ్మకం మాత్రమే, దీనికి శాస్త్రీయ ఆధారం లేదు. సూర్యగ్రహణంలా కాకుండా, చంద్రగ్రహణాన్ని ఎటువంటి కళ్లజోడు లేకుండా నేరుగా కళ్లతో చూడవచ్చు. ఇది కళ్లకు ఎటువంటి హాని చేయదు అని నిపుణులు సూచిస్తున్నారు.