వాయువ్య బంగాళాఖాతం (Bay of Bengal)లో అల్పపీడనం (Low Pressure) కేంద్రీకృతమైంది. దీని ప్రభావంతో ఆంధ్రప్రదేశ్‌ (Andhra Pradesh)లో విస్తృతంగా వర్షాలు (Rains) కురిసే అవకాశం ఉందని వాతావరణ శాఖ (Weather Department) హెచ్చరించింది. ముఖ్యంగా కృష్ణా జిల్లాలో భారీవర్షాలు పడే అవకాశముందని, శ్రీకాకుళం, విజయనగరం, మన్యం, అల్లూరి, పశ్చిమగోదావరి, ఏలూరు, ఎన్టీఆర్, గుంటూరు జిల్లాల్లో మోస్తరు నుంచి భారీ వర్షాలు (Heavy Rains) కురిసే అవకాశం ఉందని సూచించారు. మిగతా జిల్లాల్లో తేలికపాటి వర్షాలు నమోదవుతాయని అంచనా.
తీరం వెంబడి గంటకు 40-60 కిమీ వేగంతో ఈదురుగాలులు వీచే అవకాశముండటంతో మత్స్యకారులు సముద్ర వేటకు వెళ్లొద్దని హెచ్చరికలు జారీ చేశారు. వినాయక మండపాల నిర్వాహకులు వర్షాలకు తగిన జాగ్రత్తలు తీసుకోవాలని అధికారులు సూచించారు. అలాగే ప్రజలు కూడా అప్రమత్తంగా ఉండాలని, తక్కువ ప్రదేశాల్లో నీరు నిలిచే అవకాశం ఉన్నందున జాగ్రత్తలు తీసుకోవాలని సూచించారు.
గడిచిన 24 గంటల్లో ఉత్తర కోస్తా జిల్లాల్లో కుండపోత వాన కురిసింది. విశాఖలో వాతావరణ పరిస్థితి తీవ్రంగా మారుతూ ఉండగా, పోర్టులకు స్థానికంగా 3వ నెంబరు ప్రమాద హెచ్చరికలు జారీ చేశారు. వాతావరణశాఖ అంచనాల ప్రకారం, ఈ అల్పపీడనం మరింత బలపడే అవకాశం ఉండటంతో రాబోయే 24 గంటలు కీలకంగా మారనున్నాయి.
