కొన్నిసార్లు చిన్న బడ్జెట్ సినిమాలు కూడా పెద్ద సంచలనం సృష్టిస్తాయి. కంటెంట్ బాగుంటే ప్రేక్షకులు వాటిని ఆదరిస్తారనడానికి మరో ఉదాహరణగా నిలిచింది ‘లిటిల్ హార్ట్స్’ (Little Hearts) సినిమా. సెప్టెంబర్ 5న విడుదలైన ఈ చిత్రం, తొలి రోజునే సూపర్ హిట్ టాక్‌తో దూసుకుపోతోంది. మౌళి తనుజ్ (Mouli Tanuj) హీరోగా, సాయి మార్తాండ్ (Sai Marthand) దర్శకత్వంలో వచ్చిన ఈ యూత్‌ఫుల్ ఎంటర్‌టైనర్‌ను ఈటీవీ విన్ ప్రొడక్షన్ నిర్మించింది.
ప్రీమియర్ షోలతోనే ఈ సినిమాకు మంచి టాక్ రావడంతో మొదటి రోజు భారీగా టికెట్లు అమ్ముడయ్యాయి. చాలా చోట్ల థియేటర్లు హౌస్ ఫుల్ అయ్యాయి. ఈ సినిమా ప్రీమియర్స్‌తోనే రూ. 15 లక్షల గ్రాస్ కలెక్షన్స్ సాధించింది. ఇక, మొదటి రోజు ఏకంగా రూ. 2.68 కోట్ల గ్రాస్ కలెక్షన్స్ రాబట్టింది.
తొలిరోజునే బ్రేక్ ఈవెన్ సాధించిన ‘లిటిల్ హార్ట్స్’
‘లిటిల్ హార్ట్స్’ సినిమా బడ్జెట్ కేవలం రూ. 2 కోట్లు. దీంతో తొలిరోజు కలెక్షన్లతోనే ఈ సినిమా లాభాల్లోకి వచ్చేసింది. ఈ మధ్య కాలంలో తొలిరోజునే బ్రేక్ ఈవెన్ అయిన సినిమాలు చాలా అరుదుగా వస్తున్నాయి. ఈ ఏడాదిలో ఈ రికార్డు సాధించిన మొదటి సినిమా బహుశా ఇదే కావచ్చని సినీ వర్గాలు చెబుతున్నాయి.
తక్కువ బడ్జెట్, మౌత్ టాక్ బాగుండటం ఈ సినిమాకు బాగా కలిసి వచ్చాయి. ముఖ్యంగా కామెడీ, యూత్‌కు కనెక్ట్ అయ్యే సన్నివేశాలు సినిమా విజయానికి ప్రధాన కారణం. వయసు పైబడిన వారికి ఈ సినిమా అంతగా నచ్చకపోవచ్చు కానీ, యువ ప్రేక్షకులకు ఇది బాగా నచ్చింది. మొత్తానికి, మౌళి తన మొదటి సినిమాతోనే మంచి హిట్ అందుకుని, రికార్డులు కూడా సృష్టించాడు. ఈ విజయం అతనికి మరిన్ని మంచి అవకాశాలను తెచ్చిపెట్టే అవకాశం ఉంది. రాబోయే సోమవారం వరకు కూడా ఈ సినిమా భారీగా కలెక్షన్లు సాధిస్తుందని సినీ విశ్లేషకులు అంచనా వేస్తున్నారు.
