మహా కుంభమేళాలో పూసలు అమ్ముతూ తనదైన అందంతో ఓవర్ నైట్ స్టార్గా మారిన యువతి మోనాలిసా ఇప్పుడు ఏకంగా పాన్ ఇండియా హీరోయిన్గా పరిచయం కాబోతోంది. కుంభమేళాలో ఆమెను చూసి ఆకట్టుకున్న బాలీవుడ్ దర్శక-నిర్మాత ఒకరు ఆమెకు అడ్వాన్స్ ఇచ్చి బుక్ చేసినా ఆ ప్రాజెక్ట్ కార్యరూపం దాల్చలేదు. ఆ తర్వాత షాప్ ఓపెనింగ్లతో బిజీగా గడిపిన ఈ అమ్మడిని, ఇప్పుడు టాలీవుడ్ పాన్ ఇండియా స్థాయిలో హీరోయిన్గా పరిచయం చేసేందుకు సిద్ధమైంది. ఈ రోజు (నవంబర్ 5, 2025) హైదరాబాదులో ఆమె నటిస్తున్న కొత్త సినిమా పూజా కార్యక్రమం జరగబోతోంది. ఈ చిత్రం తెలుగు, తమిళ, కన్నడ, మలయాళ, హిందీ భాషల్లో ఏకకాలంలో ప్రారంభం కావడం విశేషం.
ఈ పాన్ ఇండియా చిత్రంలో ‘క్రష్’, ‘ఇట్స్ ఓకే గురు’ సినిమాల హీరో చరణ్ సాయి కథానాయకుడిగా నటిస్తున్నారు. ఈ సినిమాను శ్రీ వెంగమాంబ మూవీస్ బ్యానర్పై అంజయ్య విరిగినేని, ఉషా విరిగినేని నిర్మిస్తున్నారు. గతంలో ‘లవ్ కే రన్’, ‘ఏకే రావు పీకే రావు’ వంటి చిత్రాలకు దర్శకత్వం వహించిన శ్రీను కోటపాటి ఈ సినిమాకు దర్శకత్వం వహిస్తున్నారు. పూజా కార్యక్రమం అనంతరం సినిమాకు సంబంధించిన మరిన్ని వివరాలను చిత్ర బృందం వెల్లడించే అవకాశం ఉంది.
