బెంగళూరు (Bengaluru)లోని చిన్నస్వామి స్టేడియం (Chinnaswami Stadium) బ‌య‌ట జరిగిన తొక్కిసలాట (Stampede) ఘటనలో 11 మంది మరణించగా, 50 మందికి పైగా గాయపడిన సంఘటనకు సంబంధించి కర్ణాటక స్టేట్ క్రికెట్ అసోసియేషన్ (KSCA) అధికారులపై నమోదైన ఎఫ్‌ఐఆర్‌ను (FIR) రద్దు చేయాలని కోరుతూ KSCA కర్ణాటక హైకోర్టులో (Karnataka High Court) రిట్ పిటిషన్ (Writ Petition) దాఖలు చేసింది. KSCA అధికారులు ఎఫ్‌ఐఆర్ మరియు దాని నుండి ఉత్పన్నమయ్యే చట్టపరమైన చర్యలను నిలిపివేయాలని మధ్యంతర ఉపశమనం కోరారు.
ఘటన నేపథ్యం
ఐపీఎల్ 2025 విజయోత్సవంలో భాగంగా రాయల్ ఛాలెంజర్స్ బెంగళూరు (RCB) జూన్ 4న చిన్నస్వామి స్టేడియం వద్ద వేడుకలు నిర్వహించింది. లక్షలాది అభిమానుల రద్దీ కారణంగా స్టేడియం వెలుపల తొక్కిసలాట జరిగి, 11 మంది మరణించారు, 56 మంది గాయపడ్డారు. ఈ ఘటనపై కర్ణాటక పోలీసులు RCB, ఈవెంట్ మేనేజ్‌మెంట్ సంస్థ DNA ఎంటర్‌టైన్‌మెంట్, మరియు KSCAపై ఎఫ్‌ఐఆర్ నమోదు చేశారు. ముఖ్యమంత్రి(CM)సిద్ధరామయ్య (Siddaramaiah) బాధ్యతారాహిత్యం, నిర్లక్ష్యం ఉందని పేర్కొంటూ సంబంధిత ప్రతినిధుల అరెస్టును ఆదేశించారు. RCB మార్కెటింగ్ హెడ్ (Marketing Head) నిఖిల్ సోసాలే (Nikhil Sosale), DNA ఎంటర్‌టైన్‌మెంట్‌కు చెందిన సునీల్ మాథ్యూ (Sunil Mathew) సహా నలుగురిని పోలీసులు అదుపులోకి తీసుకున్నారు.
KSCA వాదనలు
KSCA అధ్యక్షుడు రఘురామ్ భట్, కార్యదర్శి ఎ. శంకర్, కోశాధికారి ఈ.ఎస్. జయరాం దాఖలు చేసిన పిటిషన్‌లో, తమ పాత్ర కేవలం స్టేడియం అద్దె ఒప్పందం వరకే పరిమితమని, టికెటింగ్, గేట్ నియంత్రణ, గుంపు నిర్వహణ బాధ్యతలు RCB మరియు పోలీసులదేనని వాదించారు. జూన్ 3, 2025న భద్రతా ఏర్పాట్ల కోసం పోలీసులకు అధికారికంగా అభ్యర్థన చేసినట్లు పేర్కొన్నారు. ఎఫ్‌ఐఆర్ రాజకీయ ఒత్తిడితో, ప్రాథమిక విచారణ లేకుండా నమోదైందని, ఈ ఘటన గుంపు రద్దీ వల్ల జరిగిన అనుకోని ప్రమాదమని వారు తెలిపారు.
కర్ణాటక హైకోర్టు ఈ ఘటనను సుమోటోగా స్వీకరించి విచారణ జరుపుతోంది. ప్రభుత్వం రిటైర్డ్ జస్టిస్ మైఖేల్ డి’కున్హా నేతృత్వంలో ఒక ఏకసభ్య కమిషన్‌ను నియమించింది, ఇది 30 రోజుల్లో నివేదిక సమర్పించనుంది. KSCA అధికారులు తమపై చర్యలు నిలిపివేయాలని కోరుతూ, న్యాయపోరాటం కొనసాగిస్తున్నారు.
