లండన్‌ (London)లోని ఓవల్ (Oval) మైదానంలో ఇంగ్లాండ్ (England)తో జరుగుతున్న ఐదో టెస్టు (Fifth Test)లో భారత జట్టు తొలి రోజు తడబడింది. 6 వికెట్లు కోల్పోయి 204 పరుగులు మాత్రమే చేసింది. అయితే, వరుసగా వికెట్లు కోల్పోయి కష్టాల్లో పడిన జట్టును మిడిలార్డర్ బ్యాటర్ కరుణ్ నాయర్ (Karun Nair) ఆదుకున్నాడు. నాయర్ 98 బంతుల్లో 52 పరుగులతో నాటౌట్‌గా ఉన్నాడు. అతనితో పాటు వాషింగ్టన్ సుందర్ (19) క్రీజులో ఉన్నాడు.
భారత బ్యాటర్లలో యశస్వి జైశ్వాల్ (2), కేఎల్ రాహుల్ (14), రవీంద్ర జడేజా (9), కెప్టెన్ శుభ్‌మన్ గిల్ (21) నిరాశపరిచారు. సాయి సుదర్శన్ (38) మాత్రం పర్వాలేదనిపించాడు. ఇంగ్లాండ్ బౌలర్లలో జోష్ టంగ్, అట్కిన్సన్ చెరో రెండు వికెట్లు తీసుకోగా, క్రిస్ వోక్స్ ఒక వికెట్ పడగొట్టాడు.
వాన ప్రభావం, గిల్ బ్యాటింగ్ నిర్ణయం
టీమిండియా బ్యాటింగ్ వైఫల్యానికి ప్రధాన కారణం వర్షమే అని చెప్పాలి. వరుసగా కురిసిన వర్షం (Rain) వల్ల స్టేడియం పచ్చిగా మారడంతో ఇంగ్లాండ్ బౌలర్లకు అనుకూలంగా మారింది. దీనితో వారు వరుస సెషన్స్‌లో టీమిండియాపై ఒత్తిడి పెంచి వికెట్లు సాధించగలిగారు.
మరోవైపు, శుభ్‌మన్ గిల్ వరుసగా ఐదో టెస్టులోనూ టాస్ ఓడిపోవడం జట్టు వ్యూహాలపై తీవ్ర ప్రభావం చూపింది. రెండో రోజు ఆటలో బ్యాటింగ్ పటిష్టంగా కొనసాగితేనే భారత్ తిరిగి మ్యాచ్ లో నిలబడుతుంది, లేదంటే ఈ సిరీస్‌ను కోల్పోయే అవకాశం ఉంది.
వివాదాస్పద అంపైరింగ్
భారత్ ఇన్నింగ్స్‌లో ఓ ఆసక్తికర సంఘటన జరిగింది. ఫీల్డ్ అంపైర్ కుమార ధర్మసేన ప్రవర్తన చర్చనీయాంశమైంది. 13వ ఓవర్‌లో టంగ్ బౌలింగ్‌లో సాయి సుదర్శన్ యార్కర్‌ను ఆడలేక కిందపడిపోయాడు. బంతి ప్యాడ్స్‌కు తగలడంతో టంగ్ ఎల్బీడబ్ల్యూ కోసం అప్పీల్ చేశాడు. దీనిని ధర్మసేన తిరస్కరించడం వరకు బాగానే ఉంది. అయితే, అవుట్ కాదని చెబుతూనే అతను బంతి ముందే బ్యాట్‌కు తగిలినట్లుగా తన వేళ్లతో ఇంగ్లాండ్ జట్టుకు సైగ చేశాడు.
నియమాల ప్రకారం, డీఆర్‌ఎస్ కోసం ఇచ్చే 15 సెకన్లు ముగిసే వరకు అంపైర్లు ఆటగాళ్లకు సహకరించే సంజ్ఞలు చేయరాదు. కానీ, ధర్మసేన అలా చేయడం వల్ల ఇంగ్లాండ్ జట్టుకు పరోక్షంగా సహాయం చేసినట్లైంది. దీంతో అంపైర్ వ్యవహరించిన తీరుపై విమర్శలు వస్తున్నాయి.
