కమల్ హాసన్ (Kamal Haasan) తాజాగా వివాదంలో చిక్కుకున్నారు. కన్నడ భాష (Kannada Language)పై ఆయన చేసిన వ్యాఖ్యలు కర్ణాటక (Karnataka) లో పెద్ద దుమారం రేపాయి, దీంతో ఆయనపై కేసు(Case) నమోదైంది. ప్రస్తుతం కమల్ నటిస్తున్న చిత్రం థగ్ లైఫ్ (Thug Life). ఈ సినిమా ప్రమోషన్ కార్యక్రమంలో భాగంగా కర్ణాటకలో జరిగిన ఓ ఈవెంట్‌లో ఆయన కన్నడ భాష గురించి వ్యాఖ్యానించారు. ఈ వ్యాఖ్యలు ఆయనకు పెద్ద తలనొప్పిగా మారాయి. ఈ వ్యాఖ్యల తర్వాత నుంచి కమల్‌పై తీవ్ర విమర్శలు వస్తున్నాయి. తాజాగా, కర్ణాటక రక్షణ వేదిక (Karnataka Rakshana Vedike) బెంగళూరు (Bengaluru)లోని ఆర్‌టీ నగర్ పోలీస్ స్టేషన్‌లో కమల్ హాసన్‌పై ఫిర్యాదు చేసింది. కన్నడ భాషను అవమానించేలా మాట్లాడినందుకు ఆయనపై చర్యలు తీసుకోవాలని పోలీసులను కోరింది.
థగ్ లైఫ్ ప్రమోషన్ ఈవెంట్‌లో కమల్ హాసన్ మాట్లాడుతూ, కన్నడ భాష తమిళం నుంచి పుట్టిందని వ్యాఖ్యానించారు. ఈ వ్యాఖ్యలు కర్ణాటకలో తీవ్ర ఆగ్రహానికి దారితీశాయి. అనేక ప్రాంతాల్లో కమల్‌కు వ్యతిరేకంగా నిరసనలు చెలరేగాయి. అయినప్పటికీ, కమల్ ఈ విమర్శలను పట్టించుకోకుండా, తాను వివాదాస్పద వ్యాఖ్యలు చేయలేదని, క్షమాపణ చెప్పే ప్రసక్తే లేదని స్పష్టం చేశారు.
కర్ణాటకలో గత కొంతకాలంగా భాషా వివాదాలు ఉద్భవిస్తున్నాయి. రాష్ట్రంలో నివసించే వారు కన్నడ భాషలోనే మాట్లాడాలని డిమాండ్ చేస్తూ నిరసనలు జరుగుతున్నాయి. ఇలాంటి సున్నితమైన పరిస్థితుల్లో కమల్ చేసిన వ్యాఖ్యలు నిప్పుల్లో పెట్రోల్ పోసినట్లు మంటలను రేపాయి. దీంతో థగ్ లైఫ్ సినిమాను కర్ణాటకలో నిషేధించాలని డిమాండ్లు పెరుగుతున్నాయి. కమల్ హాసన్ క్షమాపణలు చెప్పకపోతే ఈ వివాదం చల్లారే అవకాశం కనిపించడం లేదు.
