మేడ్చల్ (Medchal) జిల్లా జీడిమెట్ల (Jeedimetla) పోలీస్ స్టేషన్ పరిధిలోని NLB నగర్‌లో జరిగిన ఓ దారుణ హత్య కేసు సమాజాన్ని కలవరపెడుతోంది. 10వ తరగతి చదువుతున్న 16 ఏళ్ల బాలిక ప్రియుడి (Boyfriend’s) స‌హాయంతో కన్నతల్లిని (Own Mother) హ‌త‌మార్చిన దారుణ ఘటన తెలంగాణ రాష్ట్ర (Telangana State) వ్యాప్తంగా సంచ‌ల‌నంగా మారింది. ఎనిమిది నెలల క్రితం ఇన్‌స్టాలో ప‌రిచ‌య‌మైన తన ప్రియుడు పగిల్ల శివ (19), అతని తమ్ముడు పగిల్ల యశ్వంత్ (Yashwanth (18)తో కలిసి తన తల్లి అంజలి (Anjali) (39)ని గొంతు నులిమి, సుత్తితో తలపై కొట్టి, కత్తితో పీక కోసి దారుణంగా హత్య చేసింది. ప్రేమ వ్యవహారంపై తల్లి మందలించడంతో కోపంతో ఈ హత్యకు పాల్పడినట్లు పోలీసులు ప్రాథమిక విచారణలో తెలుసుకున్నారు.
మృతురాలు అంజలి, చాకలి ఐలమ్మ మునిమనవరాలిగా గుర్తించబడింది. 8 నెలల క్రితం నల్గొండకు చెందిన శివతో బాలికకు పరిచయం ఏర్పడి, అది ప్రేమగా మారింది. అయితే, పదో తరగతి చదువుతున్న కూతురు ప్రేమలో ఉందని తెలిసిన అంజలి, ఆమెను “ప్రేమ ఏంటని” మందలించింది. దీంతో కోపంతో ఊగిపోయిన బాలిక, వారం క్రితం శివతో కలిసి ఇంటి నుంచి వెళ్లిపోయింది. మూడు రోజుల క్రితం తిరిగి ఇంటికి వచ్చిన ఆమె, తల్లిని అడ్డు తొలగించుకోవాలని నిర్ణయించుకుంది. జూన్ 23 సాయంత్రం నల్గొండ నుంచి జీడిమెట్లకు వచ్చిన శివ, తమ్ముడు యశ్వంత్‌తో కలిసి ఈ హత్యకు పథకం అమలు చేశారు.
హత్య సమయంలో అంజలి ఇంట్లో పూజ చేస్తుండగా, శివ వెనక నుంచి దాడి చేసి, బెడ్‌షీట్‌తో ఆమె ముఖాన్ని కప్పాడు. ఆ తర్వాత బాలిక సుత్తితో తల్లి తలపై బలంగా కొట్టగా, యశ్వంత్ కత్తితో ఆమె పీకను కోశాడు. ఈ దాడిలో అంజలి అక్కడికక్కడే మృతిచెందింది. స్థానికుల సమాచారంతో ఘటనా స్థలానికి చేరుకున్న జీడిమెట్ల పోలీసులు, ముగ్గురు నిందితులను అదుపులోకి తీసుకున్నారు. హత్యకు ఉపయోగించిన సుత్తి, కత్తి, బెడ్‌షీట్‌ను స్వాధీనం చేసుకున్న పోలీసులు, నిందితులు నేరాన్ని అంగీకరించినట్లు తెలిపారు. బాలిక మైనర్ కావడంతో ఆమెను జువెనైల్ జస్టిస్ బోర్డు ముందు హాజరుపరచనున్నారు, శివ, యశ్వంత్‌లపై ఐపీసీ సెక్షన్ 302 (హత్య) కింద కేసు నమోదైంది.
ఈ ఘటన NLB నగర్‌లో ఉద్రిక్తతను సృష్టించింది. కన్నతల్లిని కూతురు హత్య చేయడం సమాజంలో తీవ్ర ఆందోళన కలిగించింది. “ప్రేమ వ్యవహారం కోసం ఇంత దారుణానికి ఒడిగట్టడం దారుణం” అని ఆగ్ర‌హం వ్యక్తం చేశారు. యువతలో పెరుగుతున్న హింసాత్మక ప్రవర్తన, తల్లిదండ్రులతో సంబంధాలలో లోపాలపై ఈ ఘటన చర్చకు దారితీసింది. జీడిమెట్ల పోలీసులు సీసీటీవీ ఫుటేజ్, ఇతర సాక్ష్యాలను సేకరిస్తూ విచారణను ముమ్మరం చేశారు. ఈ కేసు రాష్ట్రవ్యాప్తంగా సంచలనం సృష్టించడంతో, త్వరలో చార్జ్‌షీట్ దాఖలు చేసేందుకు పోలీసులు సిద్ధమవుతున్నారు.
