భారత్-ఇంగ్లండ్ (India-England) మధ్య జరుగుతున్న ఐదు టెస్టుల సిరీస్‌ (Five Test Matches)లో తొలి టెస్టులో భారత జట్టు ఓటమి పాలైంది. లీడ్స్‌లో జరిగిన ఈ మ్యాచ్‌లో బ్యాటర్లు అద్భుతంగా రాణించినా, బౌలింగ్ విభాగం ఆశించిన స్థాయిలో ప్రదర్శన చేయలేకపోయింది. ప్రధాన పేసర్ జస్ప్రీత్ బుమ్రా (Jasprit Bumrah) మాత్రమే కొంతవరకు మెరుగ్గా బౌలింగ్ చేశాడు. ఈ నేపథ్యంలో, రెండో టెస్టులో జట్టు కూర్పుపై, ముఖ్యంగా జస్ప్రీత్ బుమ్రా స్థానంపై తీవ్ర చర్చ జరుగుతోంది.
బుమ్రాకు విశ్రాంతికి కారణాలివే!
టీమిండియా హెడ్ కోచ్ గౌతమ్ గంభీర్ (Gautam Gambhir) ఇప్పటికే స్పష్టం చేసినట్లుగా, జస్ప్రీత్ బుమ్రా ఐదు మ్యాచ్‌ల సిరీస్‌లో కేవలం మూడు టెస్టులు మాత్రమే ఆడనున్నాడు. బుమ్రా పని భారాన్ని తగ్గించడమే దీనికి ప్రధాన కారణం. గతంలో అతను గాయాల బారిన పడిన అనుభవం ఉండటంతో, అతని ఫిట్‌నెస్‌ను కాపాడుకోవడంపై జట్టు యాజమాన్యం దృష్టి సారించింది. తొలి టెస్టులో బుమ్రా 44 ఓవర్లు బౌలింగ్ చేయడంతో, అతనిపై అదనపు భారం పడిందని భావిస్తున్నారు. ఈ కారణంతోనే రెండో టెస్టులో అతనికి విశ్రాంతినిచ్చి, తిరిగి మూడో టెస్టులో బరిలోకి దించే అవకాశం ఉంది.
బుమ్రా స్థానంలో ఎవరు?
జస్ప్రీత్ బుమ్రా లాంటి ప్రపంచ స్థాయి బౌలర్ స్థానాన్ని భర్తీ చేయడం జట్టుకు పెద్ద సవాలు. ప్రస్తుతం, అతని స్థానంలో ఇద్దరు పేసర్లు – అర్ష్‌దీప్ సింగ్, ఆకాష్ దీప్‌ల పేర్లు ప్రముఖంగా వినిపిస్తున్నాయి.
అర్ష్‌దీప్ సింగ్: ఇప్పటివరకు టెస్టు డెబ్యూ చేయని అర్ష్‌దీప్ సింగ్‌కు ఇంగ్లాండ్‌లో కౌంటీ క్రికెట్ ఆడిన అనుభవం ఉంది. ఇది అతనికి కలిసొచ్చే అంశం.
ఆకాష్ దీప్: ఆకాష్ దీప్ ఇప్పటికే టెస్టుల్లో ఆడాడు. గత సంవత్సరం భారత్‌లో పర్యటించిన ఇంగ్లాండ్‌తో జరిగిన టెస్టు మ్యాచ్‌లోనే ఆకాష్ అరంగేట్రం చేశాడు. గాయపడటానికి ముందు ఆస్ట్రేలియా పర్యటనలో కూడా ఆకాష్ దీప్ తన ప్రదర్శనతో ఆకట్టుకున్నాడు. ఆకాష్‌కు ఫస్ట్ క్లాస్ క్రికెట్ అనుభవం కూడా ఉంది. అతను 7 టెస్టు మ్యాచ్‌లలో 38 వికెట్లు పడగొట్టాడు.
ఈ ఇద్దరిలో ఎవరికి అవకాశం దక్కుతుందనేది శుభమన్ గిల్, గౌతమ్ గంభీర్ తీసుకునే నిర్ణయంపై ఆధారపడి ఉంటుంది. తొలి టెస్టులో మహ్మద్ సిరాజ్, ప్రసిధ్ కృష్ణ ఆశించిన స్థాయిలో రాణించకపోవడంతో, పేస్ బౌలింగ్ విభాగంలో మార్పులు ఖాయమని తెలుస్తోంది.
జట్టుపై ఒత్తిడి..
తొలి టెస్టులో ఓటమితో సిరీస్‌లో వెనుకబడిన టీమిండియాపై రెండో టెస్టులో విజయం సాధించాల్సిన ఒత్తిడి పెరిగింది. ఈ కీలక సమయంలో జస్ప్రీత్ బుమ్రా లేకపోవడం జట్టుకు ఒక లోటే. అయితే, మిగిలిన బౌలర్లు తమ వంతు పాత్ర పోషించి, ఇంగ్లాండ్‌ను కట్టడి చేయాల్సిన అవసరం ఉంది. స్పిన్నర్ కుల్దీప్ యాదవ్‌ను కూడా తుది జట్టులోకి తీసుకోవాలని పలువురు మాజీ క్రికెటర్లు సూచిస్తున్నారు. ఎడ్జ్‌బాస్టన్‌లోని పిచ్ పొడిగా ఉండనుండటంతో, కుల్దీప్ ప్రభావం చూపగలడని భావిస్తున్నారు.
జులై 2న బర్మింగ్ హామ్‌లోని ఎడ్జ్‌బాస్టన్ స్టేడియంలో రెండో టెస్టు ప్రారంభం కానుంది. శుభమన్ గిల్ కెప్టెన్సీలో భారత్ ఎలా రాణిస్తుందో, జస్ప్రీత్ బుమ్రా స్థానంలో ఎవరు బరిలోకి దిగుతారో వేచి చూడాలి
