సెప్టెంబర్ 2025 నెలకు సంబంధించిన ఐసీసీ (ICC) ప్లేయర్ ఆఫ్ ది మంత్ (Player Of The Month) అవార్డుల (Awards) రేసులో భారత క్రికెటర్లు (Indian Cricketers) సత్తా చాటారు. పురుషుల విభాగంలో టీమ్ ఇండియాకు చెందిన యువ ఓపెనర్ అభిషేక్ శర్మ (Abhishek Sharma) (ఆసియా కప్ ‘ప్లేయర్ ఆఫ్ ది టోర్నమెంట్‌’, 314 పరుగులు), స్పిన్నర్ కుల్దీప్ యాదవ్ (Kuldeep Yadav) (17 వికెట్లు) నామినేట్ అయ్యారు. వీరితో పాటు జింబాబ్వేకు చెందిన బ్రియాన్ బెన్నెట్ (497 పరుగులు) కూడా రేసులో ఉన్నాడు. వీరిద్దరూ భారత్ ఆసియా కప్ గెలవడంలో కీలకమయ్యారు.
మహిళా విభాగంలో భారత డాషింగ్ ఓపెనర్ స్మృతి మంధాన (Smriti Mandhana) షార్ట్‌లిస్ట్ అయ్యింది. ఆస్ట్రేలియాపై మూడు మ్యాచ్‌ల సిరీస్‌లో మంధాన రెండు సెంచరీలు చేసింది, అందులో కేవలం 50 బంతుల్లో చేసిన సెంచరీ భారత మహిళా క్రికెట్‌లో అత్యంత వేగవంతమైనదిగా రికార్డు సృష్టించింది. ఈ రేసులో దక్షిణాఫ్రికాకు చెందిన తాజ్మిన్ బ్రిట్స్, పాకిస్తాన్‌కు చెందిన సిద్రా అమీన్‌లు కూడా ఉన్నారు.
