హిమాచల్ ప్రదేశ్‌లోని ప్రముఖ పర్యాటక ప్రదేశాల‌న్నీ మంచు దుప్పటి క‌ప్పుకున్నాయి. సిమ్లా, కులు, మనాలి వంటి నగరాల్లో మంచు కారణంగా ట్రాఫిక్ జామ్‌లు, పర్యాటకులు చిక్కుకోవడం పెద్ద సమస్యగా మారింది. ఈ పరిస్థితుల్లో, మనాలి-లేహ్ హైవేపై అటల్ టన్నెల్ వద్ద 1,500 వాహనాలు మంచులో చిక్కుకున్నాయి. వాటిని క్లియ‌ర్ చేసేందుకు పెద్ద రెస్క్యూ ఆపరేషన్ నిర్వహించారు.
8,000 మంది పర్యాటకుల రక్షణకు కృషి
సుమారు 8,000 మంది పర్యాటకులు మంచులో చిక్కుకుపోయారు. పోలీసులు, రెస్క్యూ టీమ్‌లు భద్రత కల్పించేందుకు జీరో ఉష్ణోగ్రతలలో 24 గంటల పాటు పనిచేశారు. “సోమవారం మధ్యాహ్నం 2 గంటలకు ప్రారంభమైన రెస్క్యూ ఆపరేషన్, రాత్రంతా కొనసాగింది” అని మనాలి డిఎస్పీ కెడి శర్మ చెప్పారు. మరుసటి రోజు ఉదయం 10 గంటలకు, అన్ని వాహనాలను క్లియ‌ర్ చేసి, 8,000 మంది పర్యాటకులను రక్షించామ‌ని చెప్పారు.
వాహనాలు జారిపడి ప్రాణనష్టం
హిమాచల్ ప్రదేశ్‌లోని సిమ్లా, మనాలి ప్రాంతాల్లో ఉష్ణోగ్రతలు జీరో డిగ్రీలకు ప‌డిపోయాయి. క్రిస్మస్ సెలవుల సందర్భంగా పర్యాటకులు ఈ ప్రదేశాలను సందర్శించడమే కాకుండా, ఈ మంచు వాన‌కు సంబ‌ర‌ప‌డ్డారు. కానీ, ఈ మంచు హైవే ప్రమాదాలకు కారణమవ్వడంతో, వాహనాలు జారిపడటంతో 4 మంది ప్రాణాలు కోల్పోయారు.
రోడ్ల మూసివేత, పర్యాటకులకు ఇబ్బందులు
హిమాచల్ ప్రదేశ్‌లో మంచు కారణంగా 223 రహదారులు మూసివేయబడ్డాయి. మూడు జాతీయ రహదారులు, అత్తారి-లేహ్ జాతీయ రహదారి, కులు జిల్లాలోని సైంజ్-ఔట్, కిన్నౌర్ జిల్లాలోని ఖాబ్ సంగం రోడ్లు కూడా మూసివేయబడ్డాయి.
