చిన్న సినిమాలు కూడా మంచి కంటెంట్తో వస్తే ప్రేక్షకులు ఆదరిస్తారనే విషయం మరోసారి రుజువైంది. ఇటీవల ‘లిటిల్ హార్ట్స్’, ‘రాజు వెడ్స్ రాంబాయి’ వంటి చిత్రాలు సాధించిన విజయాల తర్వాత అదే జోష్తో వచ్చిన చిత్రం ‘హే బల్వంత్’ (Hey Balwant). సుహాస్ (Suhas) ప్రధాన పాత్రలో నటించిన ఈ సినిమాను దర్శకుడు గోపి అచ్చర (Gopi Achhara) తెరకెక్కించారు. సీక్రెట్ బిజినెస్ (Secret Business) కాన్సెప్ట్ చుట్టూ తిరిగే ఈ కథ ప్రేక్షకులను ఎంతవరకు మెప్పించిందో చూద్దాం.
కథ
కృష్ణ (సుహాస్) తన తండ్రి బల్వంత్ (నరేష్) చేస్తున్న వ్యాపారాన్ని చేపట్టాలని చిన్నప్పటి నుంచే కలగంటాడు. కానీ ఆ వ్యాపారం ఏమిటో అతనికి తెలియదు. తన రహస్యాన్ని దాచేందుకు బల్వంత్ కుమారుడిని బోర్డింగ్ స్కూల్లో పెంచుతాడు. చదువు పూర్తయ్యాక ఇంటికి వచ్చిన కృష్ణ తండ్రి అనారోగ్యంతో ఉండటంతో బిజినెస్ బాధ్యతలు చేపడతాడు. అక్కడ అతనికి ఎదురైన షాక్ ఏంటి? ఆ సీక్రెట్ బిజినెస్ ఏమిటి? అది అతని ప్రేమ జీవితం, కుటుంబ బంధాలపై ఎలా ప్రభావం చూపింది? అన్నదే కథలో ప్రధానాంశం.
ఎలా ఉంది?
ఫస్ట్ హాఫ్ పూర్తిగా కామెడీ మోడ్లో సాగుతుంది. సీక్రెట్ బిజినెస్ చుట్టూ తిరిగే సన్నివేశాలు నవ్వులు పంచుతాయి. ముఖ్యంగా సుహాస్, సుదర్శన్, వెన్నెల కిశోర్ కలిసి చేసే కామెడీ ట్రాక్ బాగా వర్క్ అయింది. ఇంటర్వెల్కు ముందు వచ్చే ట్విస్ట్ కథపై ఆసక్తిని పెంచుతుంది.
సెకండ్ హాఫ్లో కథ కొంత సీరియస్ టోన్లోకి వెళ్లి కిడ్నాప్ డ్రామాగా మారుతుంది. అక్కడి నుంచి ఎమోషన్ వైపు మళ్లిన కథ తండ్రి-కొడుకుల బంధాన్ని హైలైట్ చేస్తుంది. అయితే డెడ్ బాడీ చుట్టూ నడిచే ఎపిసోడ్ కొంత బలహీనంగా అనిపిస్తుంది. చివరి ఇరవై నిమిషాలు మాత్రం భావోద్వేగంగా బాగా కనెక్ట్ అవుతాయి.
నటీనటులు
సుహాస్ తన స్టైల్కు తగ్గ పాత్రలో మరోసారి మెప్పించాడు. కామెడీ టైమింగ్తో పాటు ఎమోషనల్ సీన్స్లో కూడా తన మార్క్ చూపించాడు. నరేష్ పాత్రకు ఇచ్చిన ఎలివేషన్ సన్నివేశాలు వినోదాన్ని అందించాయి. శివానీ నాగారం చురుకైన పాత్రలో కనిపించింది. వెన్నెల కిశోర్, సుదర్శన్, అజయ్ ఘోష్ తమ పాత్రల మేరకు ఆకట్టుకున్నారు.
సాంకేతిక విభాగం
వివేక్ సాగర్ సంగీతం సినిమాకు సపోర్ట్గా నిలిచింది. పాటలు అంతగా గుర్తుండకపోయినా బ్యాక్గ్రౌండ్ స్కోర్ కొన్ని కీలక సన్నివేశాల్లో ప్రభావం చూపింది. సినిమాటోగ్రఫీ, ఎడిటింగ్ డీసెంట్గా ఉన్నాయి. నిర్మాణ విలువలు కథకు తగ్గట్టుగా కనిపించాయి.
ప్లస్ పాయింట్స్
సుహాస్ నటన, కామెడీ ట్రాక్, ఇంటర్వెల్ ట్విస్ట్, తండ్రి-కొడుకుల ఎమోషన్
మైనస్ పాయింట్స్
సెకండ్ హాఫ్లో లాగ్, డెడ్ బాడీ డ్రామా బలహీనత, గుర్తుండని పాటలు
కామెడీ, ఎమోషన్ మిక్స్ చేసిన లైట్ ఫ్యామిలీ ఎంటర్టైనర్గా ‘హే బల్వంత్’ ఒకసారి చూడదగ్గ సినిమా.
రేటింగ్: 2.5/5
