రానున్న మూడు రోజులు ఆంధ్రప్రదేశ్‌ (Andhra Pradesh) రాష్ట్రాన్ని భారీ వర్షాలు ముంచెత్తనున్నాయి. పశ్చిమ మధ్య బంగాళాఖాతం (Bay of Bengal)లో ఏర్పడిన తీవ్ర అల్పపీడనం (Low Pressure) వాయువ్య దిశగా కదులుతోంది. రానున్న 12 గంటల్లో వాయుగుండంగా, తరువాతి రెండు రోజుల్లో తీవ్ర వాయుగుండం (Cyclone)గా బలపడే అవకాశం ఉందని వాతావరణ శాఖ (Weather Department) తెలిపింది. అక్టోబర్‌ 3వ తేదీ నాటికి ఉత్తర కోస్తా–దక్షిణ ఒడిశా మధ్య తీరం దాటే అవకాశం ఉందని అంచనా వేస్తోంది.
నేడు విజయనగరం, విశాఖపట్నం, అనకాపల్లి, కాకినాడ, కోనసీమ, ఉభయ గోదావరి, యానాం జిల్లాల్లో భారీ నుండి అతి భారీ వర్షాలు కురిసే అవకాశం ఉంది. అదేవిధంగా అల్లూరి సీతారామరాజు, పరవతిపురం మన్యం, శ్రీకాకుళం, ఏలూరు, కృష్ణా, గుంటూరు, బాపట్ల జిల్లాల్లో కూడా భారీ వర్షాలు కురవనున్నాయి. రానున్న మూడు రోజులపాటు రాష్ట్ర వ్యాప్తంగా విస్తారంగా వర్షాలు కురిసే అవకాశం ఉందని వాతావరణ శాఖ హెచ్చరించింది.
వర్షాలతో పాటు రైలు, రోడ్డు రవాణా మార్గాలు దెబ్బతినే అవకాశం ఉందని అధికారులు సూచించారు. నవరాత్రి ఉత్సవాల సందర్భంలో ఎక్కువ మంది ఒకేచోట గుమిగూడకుండా జాగ్రత్తలు తీసుకోవాలని సూచించారు. అన్ని పోర్టులకు మూడో నెంబర్ ప్రమాద హెచ్చరికలు జారీ చేశారు. రానున్న నాలుగు రోజులపాటు మత్స్యకారులు సముద్ర వేటకు వెళ్లరాదని హెచ్చరించారు. తీరం దాటే వాయుగుండం ప్రభావంతో తీరప్రాంతాల్లో బలమైన గాలులు, అలలు ఉధృతంగా ఉండే అవకాశం ఉందని వాతావరణ శాఖ స్పష్టం చేసింది.
