బెంగళూరులోని చిన్నస్వామి స్టేడియం ఈరోజు సాయంత్రం ఒక చారిత్రాత్మక సంఘటనకు వేదికగా మారనుంది. ఇండియన్ ప్రీమియర్ లీగ్ (IPL) 2025 సీజన్‌లో రాయల్ ఛాలెంజర్స్ బెంగళూరు (RCB) , కోల్‌కతా నైట్ రైడర్స్ (KKR) మధ్య జరగనున్న మ్యాచ్‌పై దేశవ్యాప్తంగా ఆసక్తి నెలకొనగా, ఈ మ్యాచ్‌లో విరాట్ కోహ్లికి అభిమానులు అపూర్వమైన ట్రిబ్యూట్ ఇవ్వడానికి సిద్ధమవుతున్నారు. ఇటీవల టెస్టు క్రికెట్ నుంచి రిటైర్మెంట్ ప్రకటించిన కోహ్లి, తన తొలి IPL మ్యాచ్‌తో అభిమానుల ముందుకు రాబోతున్నారు. ఈ సందర్భంగా RCB అభిమానులు స్టేడియంను టెస్టు జెర్సీలతో నింపి, కోహ్లి టెస్టు కెరీర్‌కు ఘనమైన ట్రిబ్యూట్ ఇవ్వాల‌ని నిర్ణయించారు.
అభిమానుల భావోద్వేగ పిలుపు
విరాట్ కోహ్లి టెస్టు క్రికెట్‌లో 123 మ్యాచ్‌లు ఆడి, 46.85 సగటుతో 9,230 పరుగులు సాధించారు. 30 సెంచరీలు, 31 అర్ధ సెంచరీలతో భారత టెస్టు క్రికెట్‌ను కొత్త శిఖరాలకు చేర్చిన కోహ్లి, టెస్టు కెప్టెన్‌గా 68 మ్యాచ్‌లలో 40 విజయాలతో అత్యంత విజయవంతమైన క్రీడాకారుడిగా నిలిచారు. ఈ అసాధారణ రికార్డులతో పాటు, టెస్టు క్రికెట్ పట్ల కోహ్లి చూపిన నిబద్ధత అభిమానుల హృదయాలను గెలుచుకుంది. ఈ నేపథ్యంలో, సోషల్ మీడియాలో RCB అభిమానులు ఒక ప్రత్యేక క్యాంపెయిన్‌ ప్రారంభించారు. “మే 17న చిన్నస్వామి స్టేడియంలో జరిగే RCB vs KKR మ్యాచ్‌లో టెస్టు జెర్సీలు లేదా తెల్లని దుస్తులు ధరించి కోహ్లికి ట్రిబ్యూట్ ఇద్దాం” అని వారు పిలుపునిచ్చారు. ఈ పిలుపు సోషల్ మీడియాలో వైరల్‌గా మారి, వేలాది మంది అభిమానుల మద్దతును సంపాదించింది.
చిన్నస్వామిలో తెల్ల జెర్సీలు
సాధారణంగా RCB మ్యాచ్‌లలో ఎరుపు-నలుపు జెర్సీలతో కనిపించే చిన్నస్వామి స్టేడియం, ఈసారి తెల్ల జెర్సీలతో కనిపించనుంది. అభిమానులు భారత టెస్టు జెర్సీలు లేదా సాదా తెల్లని టీ-షర్టులు ధరించి, కోహ్లి టెస్టు క్రికెట్‌కు చేసిన సేవలను స్మరించుకోవాలని భావిస్తున్నారు. స్టేడియం వెలుపల కోహ్లి నంబర్ 18 టెస్టు జెర్సీలు హాట్‌కేక్‌ల్లా అమ్ముడవుతున్నాయి, వీధి వ్యాపారులు ఈ అవకాశాన్ని సద్వినియోగం చేసుకుంటూ తెల్లని జెర్సీలను పెద్ద ఎత్తున విక్రయిస్తున్నారు. ఈ దృశ్యం చిన్నస్వామి స్టేడియం చుట్టూ ఒక పండుగ వాతావరణాన్ని సృష్టించింది.
వాతావరణ ఆందోళన
ఈ మ్యాచ్‌పై వాతావరణం ప్రభావం చూపే అవకాశం ఉందని ఐఎండీ హెచ్చరించింది. బెంగళూరులో సాయంత్రం 7 గంటల సమయంలో భారీ వర్షం, ఉరుములతో కూడిన జల్లులు కురిసే అవకాశం ఉందని అంచనా. అయితే, చిన్నస్వామి స్టేడియం ఆధునిక డ్రైనేజీ వ్యవస్థ కారణంగా వర్షం ఆగిన వెంటనే ఆట పునఃప్రారంభమయ్యే అవకాశం ఉంది. ఈ వాతావరణ పరిస్థితులు అభిమానుల ట్రిబ్యూట్ ప్లాన్‌ను ప్రభావితం చేయకపోవచ్చని, అయినప్పటికీ ఆట సజావుగా సాగాలని అభిమానులు కోరుకుంటున్నారు.
