హైదరాబాద్లో డ్రగ్స్ మాఫియా కార్యకలాపాలు మరోసారి వెలుగులోకి వచ్చాయి. అత్యంత ఖరీదైన ప్రాంతమైన గచ్చిబౌలిలోని ఓ కోలివింగ్ గెస్ట్ హౌస్లో జరుగుతున్న డ్రగ్ పార్టీపై స్పెషల్ ఆపరేషన్ టీమ్ (SOT) దాడులు నిర్వహించింది. అర్ధరాత్రి వేళలో మెరుపుదాడి చేసిన పోలీసులు, డ్రగ్స్ మత్తులో పార్టీ చేసుకుంటున్న యువతీయువకులను అదుపులోకి తీసుకుని, మొత్తం 12 మందిని అరెస్టు చేసినట్లు ధృవీకరించారు. దర్యాప్తులో, కర్ణాటక రాష్ట్రం నుంచి డ్రగ్స్ను స్మగ్లింగ్ చేసి హైదరాబాద్ యువతకు సరఫరా చేస్తున్న ప్రధాన స్మగ్లర్ గుత్తా తేజకృష్ణతో పాటు, అతనికి సహకరించిన ఒక నైజీరియన్ పౌరుడిని కూడా పోలీసులు అరెస్టు చేశారు.
ఈ ఘటన హైటెక్ సిటీ పరిసరాల్లో డ్రగ్స్ పార్టీల కేసుల నేపథ్యంలో పోలీసులను మరింత అప్రమత్తం చేసింది. గచ్చిబౌలిలోని లగ్జరీ గెస్ట్ హౌస్లలో జరిగే అసాంఘిక కార్యకలాపాలను పర్యవేక్షించేందుకు ప్రత్యేక దళాలను ఏర్పాటు చేసినట్లు అధికారులు ప్రకటించారు. డ్రగ్స్ మాఫియాపై కఠిన చర్యలు కొనసాగుతాయని, అలాగే, ఇలాంటి డ్రగ్ పార్టీలకు హాజరయ్యే వారిని కూడా చట్టం ముందు నిలబెడతామని పోలీసులు గట్టిగా హెచ్చరించారు.
