ఫ్రాన్స్ అధ్యక్షుడు (France President) ఇమ్మాన్యుయేల్ మాక్రాన్ (Emmanuel Macron), ఆయన సతీమణి బ్రిగిట్టే మాక్రాన్ (Brigitte Macron)ల మధ్య జరిగిన ఒక అసాధారణ సంఘటన సోషల్ మీడియాలో సంచలనం సృష్టించింది. వియత్నాం పర్యటనలో భాగంగా హనోయ్‌ (Hanoi)లోని నోయ్ బాయ్ (Noi Bai) విమానాశ్రయం (Airport)లో వారి విమానం ల్యాండ్ అయినప్పుడు, విమానం డోర్‌ తెరవగానే బ్రిగిట్టే మాక్రాన్ తన భర్త ముఖంపై చేతులతో నెట్టినట్లు కనిపించే వీడియో వైరల్‌గా మారింది. ఈ ఘటన సోషల్ మీడియాలో తీవ్ర చర్చనీయాంశమై, హాస్యాస్పదమైన మీమ్స్, కామెంట్స్‌ ఇంటర్నెట్‌లో హ‌ల్‌చ‌ల్ చేస్తున్నాయి.
ఈ వీడియోలో, మాక్రాన్ విమానం తలుపు వద్ద నిలబడి ఉండగా, బ్రిగిట్టే రెండు చేతులతో ఆయన ముఖాన్ని నెట్టడం కనిపిస్తుంది. ఒక్క క్షణం ఆశ్చర్యపోయిన మాక్రాన్ వెంటనే తేరుకొని వచ్చి కెమెరాల వైపు చిరునవ్వుతో హ్యాండ్ వేవ్ చేశారు. బ్రిగిట్టే శరీరం ఎక్కువగా విమానం చాటున ఉండటంతో ఆమె ముఖ కవళికలు స్పష్టంగా కనిపించలేదు. ఈ క్లిప్‌ను అసోసియేటెడ్ ప్రెస్ (Associated Press) వంటి వార్తా సంస్థలు రికార్డ్ చేశాయి, దీనితో ఇది సోషల్ మీడియాలో వేగంగా వ్యాపించింది.
ఎలీసీ ప్యాలెస్ (Elysée Palace) (ఫ్రాన్స్ అధ్యక్ష భవనం) ఈ వీడియో నకిలీదని పేర్కొంది, కానీ సోషల్ మీడియాలో వీడియో వైరల్ కావ‌డంతో తర్వాత దాన్ని క‌ప్పిపుచ్చుకునేందుకు వింత స‌మాధానాన్ని ముందుకుతెచ్చింది. మాక్రాన్ దంపతులు “పర్యటన ప్రారంభానికి ముందు ఉల్లాసంగా ఉన్న క్షణం” అని, ఇది “జంట మధ్య సన్నిహిత క్షణం” అని ఎలీసీ అధికారులు వివరించారు. మాక్రాన్ స్వయంగా ఈ ఘటన గురించి స్పందిస్తూ, “మేము తరచూ ఇలా ఆటపట్టిస్తూ జోక్ చేస్తుంటాము. ఇది ఎలాంటి గొడవ కాదు, కానీ సోషల్ మీడియాలో దీన్ని తప్పుగా అర్థం చేసుకుని అతిశయోక్తిగా చిత్రీకరించారు” అని హనోయ్‌లో విలేకరులతో అన్నారు.
ఈ వీడియో సోషల్ మీడియాలో, ముఖ్యంగా ఎక్స్ వేదికపై విపరీతంగా వైరల్ అయింది. “యూఎన్ సెక్యూరిటీ కౌన్సిల్‌లో వీటో పవర్ ఉన్న అధ్యక్షుడికి కూడా భార్య వేధింపులు త‌ప్ప‌వు” అని ఒక యూజర్ సరదాగా కామెంట్ చేయగా, మరొకరు “మాక్రాన్‌లాంటి నాయకుడికి భార్య చేతిలో చెంపదెబ్బ తప్పలేదు, సామాన్యులైన మనకు ఏమిటి ఆశ?” అని హాస్యంగా రాశారు. ఈ వీడియోను డబ్బింగ్ చేసి, WWE స్టైల్ స్లాప్ సౌండ్‌లు జోడించి, సోప్ ఒపెరా సన్నివేశాలతో పోల్చి మీమ్స్ సృష్టించారు.
The slap in slow motion as seen around the world 🌎 – are you feeling awkward @EmmanuelMacron 🤔 pic.twitter.com/85NKFoJldh
— Erica 🇺🇸🇺🇸🇺🇸 (@EricaRN4USA) May 27, 2025
రష్యన్ మీడియా, కొన్ని ఫ్రెంచ్ వ్యతిరేక ఖాతాలు ఈ వీడియోను ఉపయోగించి మాక్రాన్‌ను కించపరిచే ప్రయత్నం చేశాయి. రష్యన్ విదేశాంగ శాఖ ప్రతినిధి మరియా జఖరోవా ఈ ఘటనను “రైట్ హుక్” అని వ్యంగ్యంగా పేర్కొన్నారు. అయితే, మాక్రాన్ ఈ ఆరోపణలను తోసిపుచ్చుతూ, ఇటీవలి కాలంలో తనపై వస్తున్న డిస్ ఇన్ఫర్మేషన్ క్యాంపెయిన్‌లలో ఇది ఒక భాగమని, రష్యన్ మరియు ఫ్రెంచ్ ఎక్స్‌ట్రీమిస్ట్ ఖాతాలు దీనిని వక్రీకరిస్తున్నాయని ఆరోపించారు.
మాక్రాన్ దంపతుల సంబంధం ఎప్పటి నుంచో ప్రజల ఆసక్తిని రేకెత్తిస్తోంది. బ్రిగిట్టే, మాక్రాన్ హైస్కూల్‌లో డ్రామా టీచర్‌గా ఉన్నప్పుడు ఆయనతో సంబంధం ప్రారంభమైంది. 24 ఏళ్ల వయసు తేడాతో వారి వివాహం 2007లో జరిగింది. బ్రిగిట్టేను “ఫ్రాన్స్ క్వీన్” అని విమర్శకులు పిలుస్తుండగా, ఆమె సామాజిక కార్యక్రమాల్లో చురుకైన పాత్ర పోషిస్తుంది. ఈ ఘటన మరోసారి వారి వ్యక్తిగత జీవితంపై చర్చలను రేకెత్తించింది.
ఈ వైరల్ వీడియో ఇంటర్నెట్‌లో హాస్యాస్పదమైన మీమ్స్‌తో పాటు, సోషల్ మీడియాలో డిస్‌ఇన్ఫర్మేషన్ వ్యాప్తి గురించి కూడా చర్చను తెరపైకి తెచ్చింది. “ఇది కేవలం జంట మధ్య సరదా క్షణం” అని మాక్రాన్ దంపతులు స్పష్టం చేసినప్పటికీ, ఈ ఘటన సోషల్ మీడియా యుగంలో ఒక చిన్న సంఘటన కూడా ఎలా పెద్ద వివాదంగా మారుతుందో స్పష్టం చేసింది.
The Wife 👩🏼 of French 🇫🇷 President #Macron Slaps 🫱🏻 😦 Him in The Face. pic.twitter.com/P4XPj7xDGH
— The 13th ١٣📜🪶Warrior (@strange16892330) May 26, 2025
