ప్రేమ వ్యవహారంలో అనకాపల్లి (Anakapalli) జిల్లా దేవరాపల్లి (Devarapalli) మండలం కాశీపురం గ్రామానికి చెందిన డెక్క నవీన్ (Deka Naveen) అనే యువకుడు హత్యకు గురయ్యాడు. పోలీసులు ఈ ఘటనను అధికారికంగా ధృవీకరించనప్పటికీ, ఇది శుక్రవారం రాత్రి నుండి విస్తృతంగా ప్రచారంలో ఉంది. ఈ హత్య వెనుక రాంబిల్లి మండలం వెంకటాపురం గ్రామానికి చెందిన టీడీపీ(TDP) మాజీ సర్పంచ్ (Former Sarpanch) కుటుంబం హస్తం ఉన్నట్లు తెలుస్తోంది.
ప్రేమ వ్యవహారం, హత్యకు దారితీసిన ఘటన
నవీన్ తన అమ్మమ్మతో కలిసి రాంబిల్లి మండలం చిన్నపూడి గ్రామంలో నివసిస్తున్నాడు. పదో తరగతి చదువుతున్నప్పటి నుంచే అతడికి వెంకటాపురం గ్రామానికి చెందిన టీడీపీ మాజీ సర్పంచ్ కుమార్తెతో స్నేహం ఏర్పడింది. వేర్వేరు కులాలకు చెందినవారు కావడం, నవీన్‌కు ఆస్తి లేకపోవడంతో అమ్మాయి తల్లికి వారి స్నేహం ఇష్టం లేదు. దీంతో ఆ యువతిని చెన్నైకి పంపించినా, వారి పరిచయం కొనసాగింది.
మూడు రోజుల క్రితం, యువతి తల్లి తన కుమార్తెతో కలిసి అరుణాచలానికి వెళ్లింది. అక్కడికి నవీన్‌ను రప్పించి, ఒక లాడ్జిలో దిగారు. నవీన్ ఫోన్‌లో అసభ్యకరమైన ఫొటోలు ఉన్నాయని గమనించి, యువతి తల్లి అతడిని చితక్కొట్టారని సమాచారం. ఆ తర్వాత, తమతో వచ్చిన మరో ఇద్దరితో కలిసి నవీన్‌ను హత్య చేసినట్లు తెలుస్తోంది.
ఈ హత్య వెనుక టీడీపీ నాయకులు ఉన్నట్లు విశ్వసనీయ వర్గాల సమాచారం.
ఈ ఘటనతో అరుణాచలం పోలీసులు యువతి, ఆమె తల్లిని అదుపులోకి తీసుకున్నారని, ప్రస్తుతం ఇద్దరూ జైలులో ఉన్నారని సమాచారం. ఈ కేసుపై మరింత సమాచారం కోసం పోలీసులు దర్యాప్తు చేస్తున్నారు.
