అమెరికా అధ్యక్షుడు డొనాల్డ్ ట్రంప్ మరో సంచలన నిర్ణయం తీసుకున్నారు. ఫెడరల్ ఉద్యోగులను తగ్గించేందుకు ప్రపంచ కుబేరుడు ఎలాన్ మస్క్‌కు కీలక అధికారాలు అప్పగించారు. రెండో దఫా ట్రంప్ పాలనలో మస్క్ ప్రధాన పాత్ర పోషించనున్నట్లు తెలుస్తోంది.
ఫెడరల్ ఉద్యోగుల సంఖ్యను తగ్గించేందుకు మస్క్ నేతృత్వంలోని ప్రభుత్వ సామర్థ్య శాఖకు ట్రంప్ పూర్తి అధికారం ఇచ్చారు. ఈ మేరకు ట్రంప్ ఓవల్ కార్యాలయంలో మస్క్ సమక్షంలో కార్యనిర్వాహక ఉత్తర్వులపై సంతకం చేశారు. ఈ కార్యక్రమానికి మస్క్ నాలుగేళ్ల కుమారుడు కూడా హాజరయ్యారు. ప్రభుత్వ ఉద్యోగుల తగ్గింపున‌కు మస్క్ ప్రణాళికలు రూపొందించాలని, ఉద్యోగుల రద్దుపై సమగ్ర అధ్యయనం చేయాలని, అవసరమైన చోట మాత్రమే సిబ్బందిని పరిమితం చేయాలని ట్రంప్ ఆదేశాలు జారీ చేశారు.
సంతకం అనంతరం ట్రంప్ మాట్లాడుతూ.. “మస్క్ ప్రభుత్వంలో మరిన్ని బాధ్యతలు చేపట్టాలి” అని వ్యాఖ్యానించారు. దేశ అభివృద్ధికి బాధ్యత వహించే సమర్థ వ్యక్తిగా మస్క్‌ను తాను నమ్ముతున్నానని ట్రంప్ వెల్లడించారు. ఇది చట్టబద్ధమైన ప్రక్రియగా ఉన్నప్పటికీ, దీని ప్రభావంపై తీవ్ర చర్చ జరుగుతోంది.
