చిత్ర ప‌రిశ్ర‌మ, సినిమా థియేట‌ర్ల‌పై (Cinema Theatres) ప్రముఖ నిర్మాత, తెలంగాణ ఫిల్మ్ డెవలప్‌మెంట్ కార్పొరేషన్ (ఎఫ్‌డీసీ) చైర్మన్ దిల్ రాజు (Dil Raju) సంచ‌ల‌న వ్యాఖ్యలు చేశారు. హైద‌రాబాద్‌ (Hyderabad)లో జరిగిన ‘తమ్ముడు’(Thammudu) మూవీ ట్రైలర్ (Trailer) లాంచ్ ఈవెంట్‌లో కీలక వ్యాఖ్యలు చేశారు. సినీ పరిశ్రమలో మార్పులు తీసుకురావాల్సిన అవసరం ఉందని, ప్రేక్షకులను థియేటర్లకు ఆకర్షించడమే తమ ప్రధాన లక్ష్యమని ఆయన స్పష్టం చేశారు. ఈ సందర్భంగా, తాను తన సినిమాలకు టికెట్ ధరలు (Ticket Prices) పెంచే ప్రతిపాదనలను ప్రభుత్వాలకు సమర్పించబోనని, ముఖ్యంగా ‘తమ్ముడు’ చిత్రానికి టికెట్ ధరల పెంపు కోరబోనని దిల్ రాజు ప్రకటించారు.
దిల్ రాజు మాట్లాడుతూ.. నటుడు, ఏపీ డిప్యూటీ సీఎం పవన్ కళ్యాణ్ (Pawan Kalyan) సూచనలు సినీ పరిశ్రమకు మార్గదర్శకంగా ఉన్నాయని తెలిపారు. పవన్ కళ్యాణ్ సూచించిన విధంగా, థియేటర్లలో టికెట్ ధరలు (Ticket Prices), తినుబండారాల ధరలు (Snacks Prices) సామాన్య ప్రేక్షకులకు అందుబాటులో ఉండాలని, ఇది నిర్మాతల బాధ్యతగా భావిస్తున్నానని ఆయన అన్నారు. “పవన్ కళ్యాణ్ సూచనలను నిర్మాతలందరూ తప్పకుండా పాటించాలి. సగటు ప్రేక్షకులను థియేటర్లకు తీసుకురావడం కోసం ధరల నియంత్రణ, థియేటర్లలో సౌకర్యాలు, పైరసీ నిర్మూలన వంటి అంశాలపై దృష్టి సారించాలి” అని ఆయన వ్యాఖ్యానించారు.
తెలంగాణ మంత్రివర్గ ఉపసంఘంతో జరిగిన సమావేశంలో ఈ అంశాలను చర్చించినట్లు దిల్ రాజు తెలిపారు. పవన్ కళ్యాణ్ సూచనల ఆధారంగా తెలంగాణ ప్రభుత్వానికి ప్రతిపాదనలు సమర్పించినట్లు ఆయన చెప్పారు. “ఇకపై తెలంగాణలో టికెట్ ధరల పెంపు ఉండదు. ప్రేక్షకులకు సినిమా అనుభవం సరసమైన ధరల్లో అందించడమే మా లక్ష్యం” అని దిల్ రాజు స్పష్టంచేశారు. ఈ వ్యాఖ్యలు సినీ పరిశ్రమలో సంస్కరణలకు ఊపిరిపోసే అవకాశం ఉందని, ప్రేక్షకులకు మరింత అనుకూలమైన వాతావరణం సృష్టించడానికి ఈ చర్యలు దోహదపడతాయని సినీ విశ్లేషకులు అభిప్రాయపడుతున్నారు.
