ఢిల్లీ అసెంబ్లీ ఎన్నికలు సమీపిస్తుండటంతో ఆప్-బీజేపీ మధ్య రాజకీయ మాటల యుద్ధం ముదురుతోంది. ఈ క్రమంలో బీజేపీ నేత రమేష్ బిదూరి మరోసారి వివాదాస్పద వ్యాఖ్యలు చేశారు. ముఖ్యమంత్రి అతిషి తల్లిదండ్రులు పార్లమెంట్‌పై దాడి చేసిన అఫ్జల్ గురుకు మద్దతుగా నిలబడ్డారని ఆయన ఆరోపించారు. అతిషి కుటుంబానికి భారత్‌ వ్యతిరేక మనస్తత్వం ఉందని, వారు అఫ్జల్‌ను కాపాడేందుకు ప్రయత్నించారని విమర్శించారు.
ఢిల్లీ ఎన్నికల సమరంలో బీజేపీ వ్యూహం
రానున్న ఢిల్లీ అసెంబ్లీ ఎన్నికల్లో కల్కాజీ నియోజకవర్గం నుంచి బీజేపీ తరఫున రమేష్ బిదూరి సీఎం అతిషిపై పోటీ చేయనున్నారు. ఫిబ్రవరి 5న ఎన్నికలు జరుగనుండగా, ఫలితాలు 8న వెలువడనున్నాయి. ఎన్నికల వేళ బిదూరి వరుసగా అతిషిని టార్గెట్ చేస్తూ వ్యాఖ్యలు చేస్తుండటం రాజకీయంగా చర్చనీయాంశంగా మారింది.
అతిషిపై పెరుగుతున్న ఆరోపణలు
అతిషి తండ్రి పేరు మార్పుపై కూడా బిదూరి ఆరోపణలు చేశారు. ఎన్నికలు రాగానే అతిషి ఢిల్లీ వీధుల్లో జింకలా పరుగులు పెడుతోందంటూ సెటైర్లు వేశారు. ఇక ఢిల్లీ సీఎం అభ్యర్థిగా రమేష్ బిదూరి పేరు బలంగా వినిపిస్తుండటంతో ఈ ఎన్నికలు మరింత ఆసక్తికరంగా మారనున్నాయి.
