చిన్న వయసులోనే ప్రపంచ చెస్ ఛాంపియన్ టైటిల్ కొట్టి గుకేశ్ ఘనత సాధించారు. ఆయనకు శుభాకాంక్షలు చెప్పిన వారి జాబితాలో దేశ ప్రజలు మాత్రమే కాదు, ప్రపంచ టెక్ కుబేరులు కూడా ఉన్నారు. ఎలాన్ మస్క్, సుందర్ పిచాయ్ లాంటి దిగ్గ‌జాలు గుకేశ్ విజయాన్ని ప్రశంసించారు. టైటిల్ కొట్టిన గుకేశ్ పొందిన ప్రైజ్ మనీ రూ.11 కోట్లుగా ఉంటుందని తెలియగానే, ఆసక్తికరమైన ప్రశ్నలు కూడా మొదలయ్యాయి
ప్రైజ్ మనీ లెక్కలు
వరల్డ్ చెస్ ఫెడరేషన్ (ఫిడే) ప్రకారం, ప్రపంచ ఛాంపియన్‌షిప్ మొత్తం ప్రైజ్ మనీ రూ.20.75 కోట్లు ఉంటుంది. గుకేశ్ మూడు గేమ్స్ గెలిచిన కారణంగా, రూ.5.04 కోట్లు ఆయన ఖాతాలో చేరింది. రెండు విజయాలు సాధించిన డింగ్ లిరెన్ సుమారు రూ. 3.36 కోట్లు సంపాదించాడు. మిగిలిన ప్రైజ్ పూల్ ఇద్దరు ఆటగాళ్ల మధ్య విభజించబడింది. ఫలితంగా, ఛాంపియన్‌షిప్ నుండి గుకేష్ మొత్తం సంపాదన సుమారు దాదాపు రూ. 11.34 కోట్లు.
విష‌యం ఏంటంటే.. యువ ఛాంపియన్‌కు కూడా విజయాలపై భారీ పన్ను ప్రభావం ఉంటుంది. భారతదేశంలోని ఆదాయపు పన్ను చట్టాల ప్రకారం, అతను 30 శాతం స్లాబ్‌లోకి వస్తాడు, ఈ మొత్తానికి పైగా ఆదాయపు పన్ను రూ. 4.67 కోట్లు వచ్చేలా సర్‌ఛార్జ్ ఉంటుంది. అన్ని ట్యాక్స్‌లు క‌ట్టిన త‌రువాత రూ.11.34 కోట్ల‌లో గుకేశ్‌కు రూ.6.33 కోట్లు మాత్రమే చేతికి వస్తాయి.
సోషల్ మీడియాలో ఆసక్తికర చర్చ
ప్రపంచ ఛాంపియ‌న్‌గా నిలిచిన గుకేశ్‌కు వచ్చిన ఈ ప్రైజ్ మనీపై ట్యాక్స్ చెల్లింపుల గురించి సోషల్ మీడియాలో చర్చ జరుగుతోంది. “గెలిచింది గుకేశ్ కాదు, ఆర్థిక శాఖ” అని పలువురు నెటిజన్లు కామెంట్ చేస్తున్నారు. కొంతమంది మాత్రం ఆటగాళ్లపై పన్నులు తగ్గించాలని అభిప్రాయపడుతున్నారు.
