హైదరాబాద్: సినిమా పరిశ్రమలో కార్మికుల సమస్యలపై సీపీఐ జాతీయ కార్యదర్శి నారాయణ సంచలన వ్యాఖ్యలు చేశారు. కళకు సేవ చేస్తున్న కార్మికులంతా రోడ్డున పడ్డారని ఆయన ఆవేదన వ్యక్తం చేశారు. కేవలం దర్శకులు, హీరో, హీరోయిన్లే సినిమా కాదని, కార్మికులు పని చేస్తేనే వారికి పేరు వస్తుందని స్పష్టం చేశారు.
ప్రధాన వ్యాఖ్యలు:
హీరోల పారితోషికాలు vs కార్మికుల వేతనాలు: హీరోలకు కోట్లలో పారితోషికాలు ఇస్తున్నప్పుడు, కష్టపడే కార్మికులకు కనీస వేతనాలు ఎందుకు ఇవ్వడం లేదని ఆయన ప్రశ్నించారు. “రజనీకాంత్ మేకప్ లేకుండా ఎలా ఉంటారు? అందరూ ఒకసారి ఆలోచించండి” అని ఘాటుగా వ్యాఖ్యానించారు. హీరో, హీరోయిన్లను అందంగా చూపించే కార్మికులను విస్మరించడం సరికాదన్నారు.
సినిమా పరిశ్రమపై ఆధిపత్యం: తెలుగు రాష్ట్రాల్లో సినిమా పరిశ్రమ కేవలం నలుగురి చేతుల్లో ఉందని నారాయణ ఆరోపించారు. కార్మికులను విస్మరిస్తే కమ్యూనిస్ట్ పార్టీ చూస్తూ ఊరుకోదని, కార్మికుల పక్షాన నిలబడతామని ఆయన హెచ్చరించారు.
ప్రభుత్వాల తీరుపై విమర్శలు: ముఖ్యమంత్రులు కేవలం నిర్మాతల(ప్రొడ్యూసర్లు)తోనే మాట్లాడతారని, సినిమా కార్మికులను పిలిచి ఎందుకు మాట్లాడటం లేదని ప్రశ్నించారు. బ్లాక్‌లో టికెట్లు అమ్ముకోవడానికి అనుమతిస్తున్న ప్రభుత్వాలు కూడా “వీధి రౌడీలా” వ్యవహరిస్తున్నాయని మండిపడ్డారు. బ్లాక్ టికెట్లను ప్రోత్సహించడం సరైంది కాదన్నారు.
విలువలు లేని సినిమాలు: నేటి సినిమాలు నైతిక విలువలను పాడు చేస్తూ, పాన్ మసాలా, మద్యం, జూదం వంటి వాటికి ప్రాధాన్యత ఇస్తున్నాయని విమర్శించారు.
చిరంజీవి వ్యాఖ్యల వివాదం: గతంలో తాను చిరంజీవిపై చేసిన వ్యాఖ్యలను అప్పుడే వెనక్కి తీసుకున్నానని, కానీ ఇప్పుడు ఆ వీడియోలను సోషల్ మీడియాలో వైరల్ చేసి తనను బద్నాం చేయడం సరికాదని పేర్కొన్నారు. ఈ విషయాన్ని వారి విజ్ఞతకే వదిలేస్తున్నానని అన్నారు.
