సూపర్‌స్టార్ రజనీకాంత్ నటించిన, లోకేష్ కనగరాజ్ దర్శకత్వం వహించిన ‘కూలీ’ చిత్రం ఆగస్టు 14న ప్రపంచవ్యాప్తంగా గ్రాండ్‌గా విడుదలైంది. అనిరుధ్ రవిచందర్ సంగీతం, నాగార్జున విలన్ పాత్ర, ఆమిర్ ఖాన్, ఉపేంద్ర, శృతిహాసన్, పూజా హెగ్డేల కీలక పాత్రలతో ఈ చిత్రం విడుదలకు ముందే భారీ అంచనాలను సృష్టించింది.
ఇవాళ ప్ర‌పంచ వ్యాప్తంగా విడుద‌లైన కూలీ సినిమా ఓవర్సీస్‌లో ప్రీమియర్ షోలు, భారత్‌లో తొలి ప్రదర్శనలతో ఎక్స్‌లో రివ్యూలు వెల్లువెత్తాయి. అయితే ఈ సినిమాపై అభిమానులు నుంచి మిశ్ర‌మ స్పందన వ‌స్తుంది. రజనీకాంత్ ఫ్యాన్స్‌ సినిమాను బ్లాక్‌బస్టర్‌గా అభివర్ణిస్తున్నారు. #Coolie, #SuperstarRajinikanth హ్యాష్‌ట్యాగ్‌లతో ఎక్స్‌లో ఈ సినిమా ట్రెండ్ అవుతోంది.
ప్రేక్షకుల అభిప్రాయం ప్ర‌కారం.. ‘కూలీ’ మొదటి సగం అద్భుతంగా ఉందని, రజనీకాంత్ ఇంట్రో, ఇంటర్వెల్ బ్లాక్, అనిరుధ్ బీజీఎం అభిమానులను ఆకట్టుకున్నాయని తెలుస్తోంది. నాగార్జున విలన్‌గా స్టైలిష్ పెర్ఫార్మెన్స్, ఆమిర్ ఖాన్ కామియో, పూజా హెగ్డే ‘మోనికా’ సాంగ్ హైలైట్‌గా నిలిచాయని అభిమానులు పేర్కొన్నారు. అయితే, కొందరు సెకండ్ హాఫ్ కొంత నీరసంగా, క్లైమాక్స్ ఊహించదగినదిగా ఉందని, సౌబిన్ షాహిర్ పాత్ర సాధారణంగా ఉందని విమర్శించారు. సెకండ్ హాఫ్‌లో లాజిక్ లేని సన్నివేశాలు, పేలవమైన క్లైమాక్స్ అని కొందరు అభిప్రాయ‌ప‌డుతున్నారు.
మొత్తంగా, ‘కూలీ’ రజనీకాంత్ అభిమానులకు పూర్తి స్థాయి మాస్ ఎంటర్‌టైనర్‌గా, లోకేష్ కనగరాజ్ మార్క్ యాక్షన్, ట్విస్ట్‌లతో ఆకట్టుకుందని ఎక్స్ రివ్యూలు సూచిస్తున్నాయి. రజనీకాంత్ స్టైల్, నాగార్జున విలనిజం, అనిరుధ్ బీజీఎం చిత్రానికి ప్రధాన ఆకర్షణలుగా నిలిచాయి. అయితే, కొందరు స్క్రీన్‌ప్లేలో చిన్నపాటి లోపాలు, సెకండ్ హాఫ్ నెమ్మదిగా సాగడంపై అసంతృప్తి వ్యక్తం చేశారు. సినిమా బాక్సాఫీస్ వసూళ్లు, రాబోయే రోజుల్లో ప్రేక్షకుల స్పందన ఈ చిత్రం బ్లాక్‌బస్టర్ స్థాయిని నిర్ణయించనుంది.
