ఢిల్లీ అసెంబ్లీ ఎన్నికల నేపథ్యంలో, కాంగ్రెస్ పార్టీ ప్రజల ఆకర్షణకు కొత్త గ్యారంటీలతో ముందుకొచ్చింది. ఉచిత విద్యుత్, గ్యాస్‌ సిలిండర్ల స‌బ్సిడీ, ఉచిత రేషన్ వంటి హామీలను కాంగ్రెస్ ప్రకటించింది. ఈ సందర్భంగా తెలంగాణ ముఖ్యమంత్రి రేవంత్ రెడ్డి, ఢిల్లీ పీసీసీ అధ్యక్షుడు దేవేంద్ర యాదవ్, మంత్రి పొంగులేటి శ్రీనివాసరెడ్డి ప్రత్యేకంగా గ్యారంటీల పోస్టర్లను విడుదల చేశారు.
తెలంగాణ నిబద్ధత ఢిల్లీలోనూ..
సీఎం రేవంత్ రెడ్డి మాట్లాడుతూ, తెలంగాణలో అందించిన సంక్షేమ పథకాల గురించి గుర్తుచేశారు. “రెండు లక్షల రూపాయల రుణమాఫీ, ఉచిత బస్సు ప్రయాణం, రేషన్ పంపిణీ వంటి పథకాలు మా నిబద్ధతకు నిదర్శనాలు. ఇప్పుడు ఇలాంటి హామీలను ఢిల్లీలోనూ అమలు చేస్తామని మీకు హామీ ఇస్తున్నాం” అని తెలిపారు.
కేజ్రీవాల్, మోదీ ప్రభుత్వాలపై విమర్శలు
ఢిల్లీలోని బీజేపీ మరియు ఆమ్ ఆద్మీ పార్టీల పాలనపై రేవంత్ రెడ్డి తీవ్ర విమర్శలు చేశారు. “కేజ్రీవాల్, మోదీ ఢిల్లీ ప్రజల నమ్మకాన్ని వమ్ము చేశారు. కాలుష్యం, నిరుద్యోగం, అవినీతి వంటి సమస్యలతో ఢిల్లీ నివాసయోగ్యం లేకుండా మారింది. కేజ్రీవాల్ స్కాంలు, మోదీ కార్పొరేట్ ప్రయోజనాలు ప్రజల జీవితాలను దెబ్బతీశాయి” అని ఆరోపించారు.
కాంగ్రెస్ విజయానికి నమ్మకం
“తెలంగాణలో మేము 40% ఓట్లు సాధించి అధికారంలోకి వచ్చాం. అదే విధంగా ఢిల్లీలోనూ కాంగ్రెస్ విజయాన్ని కైవసం చేసుకుంటుంది. అవినీతిని కట్టడి చేస్తూ, ప్రజల కోసం పనిచేస్తామని మేము గ్యారంటీ ఇస్తున్నాం” అని రేవంత్ రెడ్డి ధీమా వ్యక్తం చేశారు.
