బీఆర్ఎస్ భవిష్యత్తుపై ఎమ్మెల్సీ కవిత మరోసారి సంచలన వ్యాఖ్యలు

బీఆర్ఎస్ ఎమ్మెల్సీ (BRS MLC) కల్వకుంట్ల కవిత (Kalvakuntla Kavitha) మరోసారి మీడియా చిట్‌చాట్‌ (Media Chit-Chat)లో సంచలన వ్యాఖ్యలు చేశారు. మంచిర్యాల జిల్లా పర్యటన ఉన్న ఆమె భారత రాష్ట్ర సమితి (బీఆర్ఎస్)ని బీజేపీలో విలీనం చేసే కుట్రపై తీవ్ర అసంతృప్తి వ్యక్తం చేస్తూ, పార్టీ నాయకత్వం మరియు తన లేఖ వివాదంపై స్పష్టమైన వివరణ ఇచ్చారు. ఈ సందర్భంగా ఆమె చేసిన వ్యాఖ్యలు రాజకీయ వర్గాల్లో తీవ్ర చర్చనీయాంశంగా మారాయి.

మంచిర్యాల (Mancherial) లో నిర్వహించిన మీడియా సమావేశంలో కవిత తన స్థానం మరియు బీఆర్ఎస్ పార్టీ భవిష్యత్తుపై కీలక వ్యాఖ్యలు చేశారు. “నాకు సొంత అజెండా అంటూ ఏమీ లేదు. పార్టీని కాపాడుకోవడమే నా ఏకైక లక్ష్యం,” అని కవిత స్పష్టం చేశారు. “కేసీఆర్ (KCR) తప్ప మరో నాయకత్వాన్ని నేను ఒప్పుకోను. ఆయన నాయకత్వంలోనే పార్టీ బలోపేతం అవుతుంది” అని ఆమె తేల్చి చెప్పారు. “బీజేపీ(BJP)లో బీఆర్ఎస్‌ (BRS)ను విలీనం (Merger) చేయొద్దనే నా వాదన. బీజేపీతో పొత్తు పెట్టుకున్న ఏ పార్టీ బాగుపడలేదు. నేను జైల్లో ఉన్న సమయంలోనే పార్టీని విలీనం చేసే కుట్ర మొదలైంది,” అని కవిత ఆరోపించారు.

“లేఖ (Letter) రాయడంలో నా తప్పేమీ లేదు. ఎన్నో ఆవేదనలు భరించలేక కేసీఆర్‌కు లేఖ రాశాను. ఆ లేఖను బయటపెట్టిన వారిని పట్టుకోవాలి,” అని ఆమె డిమాండ్ చేశారు. “కేసీఆర్‌ను కలిసే అవకాశం వచ్చినప్పటికీ, కొన్ని కారణాల వల్ల కలవలేకపోయాను” అని కవిత వెల్లడించారు.

ఇటీవల కవిత, బీఆర్ఎస్ అధినేత కేసీఆర్‌కు రాసిన లేఖ లీక్ కావడం, ఆమె “కేసీఆర్ చుట్టూ దెయ్యాలు ఉన్నాయి” అని చేసిన వ్యాఖ్యలు పార్టీలో కల్లోలం సృష్టించాయి. ఈ లేఖలో ఆమె, పార్టీ నాయకత్వంలోని లోపాలు, బీజేపీతో సన్నిహిత సంబంధాలపై అసంతృప్తి, గ్రామస్థాయి మహిళా నాయకులకు అవకాశాలు లేకపోవడం వంటి అంశాలను ఎత్తి చూపారు. ఈ నేపథ్యంలో కవిత బీఆర్ఎస్‌ను వీడి కొత్త పార్టీ పెట్టబోతున్నారనే ఊహాగానాలు కూడా రాజకీయ వర్గాల్లో చక్కర్లు కొట్టాయి.

బీజేపీ విలీన కుట్రపై ఆరోపణలు
కవిత తన చిట్‌చాట్‌లో, తాను ఢిల్లీ లిక్కర్ స్కామ్ కేసులో జైల్లో ఉన్న సమయంలో బీఆర్ఎస్‌ను బీజేపీలో విలీనం చేసే కుట్ర మొదలైందని ఆరోపించారు. “నన్ను బెయిల్‌పై విడిపించేందుకు విలీన ప్రక్రియను ముందుకు తీసుకెళ్లారని, ఈ కుట్రలో కొందరు పార్టీ నాయకులు కూడా భాగమైనట్లు సమాచారం ఉంది,” అని ఆమె పేర్కొన్నారు. అయితే, ఈ విలీనాన్ని తాను ఎట్టి పరిస్థితుల్లోనూ ఒప్పుకోనని స్పష్టం చేశారు.

పార్టీలో అంతర్గత విభేదాలు
కవిత లేఖ మరియు ఆమె వ్యాఖ్యలు బీఆర్ఎస్‌లో అంతర్గత విభేదాలను మరింత బహిర్గతం చేశాయి. కొందరు నాయకులు, ముఖ్యంగా కేటీఆర్ మరియు హరీశ్ రావు, బీజేపీతో సన్నిహితంగా ఉన్నారని, ఈ విషయంలో కవిత అసంతృప్తితో ఉన్నారని సోషల్ మీడియాలో చర్చ జరుగుతోంది. కవిత తన లేఖలో కేటీఆర్‌ను నేరుగా టార్గెట్ చేయకపోయినా, పార్టీలోని కొందరు నాయకులు తనను దూరం చేసే ప్రయత్నం చేస్తున్నారని ఆరోపించారు.