ఆంధ్రప్రదేశ్ కేబినెట్ సమావేశం నేడు ఉదయం 11 గంటలకు సచివాలయంలో జరుగనున్నది. ముఖ్యమంత్రి నారా చంద్రబాబు నాయుడు అధ్యక్షతన జరిగే ఈ సమావేశంలో పలు కీలక అంశాలపై చర్చ జరగనుంది. ఈ సమావేశంలో ముఖ్యంగా మహిళలకు ఉచిత ఆర్టీసీ బస్సు సేవలు అందించే పథకం, గ్రామీణ ప్రాంతాల్లో అన్న క్యాంటీన్ల నిర్వహణ, గీత కులవృత్తిదారులకు 10% మద్యం షాపుల కేటాయింపులు, పరిశ్రమలకు భూమి కేటాయింపులు వంటి అనేక కీలక అంశాలపై నిర్ణయాలు తీసుకోనున్నారు.
మహిళలకు మరింత ప్రయోజనాలను అందించేందుకు ఉచిత బస్సు ప్రయాణ పథకం ప్రారంభించాలని కేబినెట్ చర్చించనుంది. గీత కులవృత్తిదారులకు 10% మద్యం షాపుల కేటాయింపునకు సంబంధించిన అంశంపై ఈ సమావేశంలో నిర్ణయం తీసుకోనున్నారు. ఆంధ్రప్రదేశ్‌లో పరిశ్రమలు ఏర్పాటు చేసేందుకు ముందుకు వచ్చిన సంస్థలకు భూమి కేటాయింపు పై చర్చ జరుగనుంది. మంత్రిమండ‌లి సమావేశం అనంతరం ముఖ్యమంత్రి చంద్రబాబు నాయుడు దావోస్ పర్యటనకు వెళ్లనున్నారు.
