ఆంధ్రప్రదేశ్‌ (Andhra Pradesh)లో వాతావ‌ర‌ణం (Weather) ఒక్క‌సారిగా మారిపోయింది. మంగ‌ళ‌వారం రాత్రి ప‌లు ప్రాంతాల్లో భారీ వ‌ర్షం (Heavy Rain) నమోదైంది. రాబోయే వారం రోజులపాటు (Week Days) భారీ నుంచి అతి భారీ వర్షాలు కురిసే అవకాశం ఉందని భారత వాతావరణ శాఖ (IMD) హెచ్చరించింది. నేడు, రేపు రాయలసీమ (Rayalaseema)లోని అనంతపురం, శ్రీ సత్యసాయి, కర్నూలు, అన్నమయ్య జిల్లాల్లో భారీ నుంచి అతిభారీ వర్షాలు కురవనున్నాయి. ఉత్తరప్రదేశ్ (Uttar Pradesh) నుంచి పశ్చిమ మధ్య (West Central) బంగాళాఖాతం (Bay of Bengal) వరకు కొనసాగుతున్న ఉపరితల ద్రోణి, 40-60 కిమీ/గంట వేగంతో వీచే ఈదురు గాలులు ఈ వర్షాలకు కారణంగా ఉన్నాయి. గడిచిన 24 గంటల్లో పార్వతీపురం మన్యం జిల్లాలో అత్యధికంగా 4.3 సెంటీమీటర్ల వర్షపాతం నమోదైంది.
ఉత్తర కోస్తా (North Coastal) ఆంధ్రలోని కొన్ని ప్రాంతాల్లో కూడా భారీ వర్షాలు కురిసే సూచనలు ఉన్నాయి. శ్రీకాకుళం, పార్వతీపురం మన్యం, అల్లూరి సీతారామరాజు జిల్లాల్లో ఉరుములు, మెరుపులతో కూడిన వర్షాలు నమోదవుతాయని IMD అంచనా వేసింది. రాయలసీమలో అతిభారీ వర్షాల కారణంగా వరదలు, రోడ్లు మూసుకుపోవడం వంటి పరిస్థితులు తలెత్తే అవకాశం ఉంది. ప్రజలు చెట్లు, విద్యుత్ స్తంభాల కింద ఆశ్రయం తీసుకోవద్దని, వ్యవసాయ కార్యకలాపాలను తాత్కాలికంగా నిలిపివేయాలని వాతావరణ శాఖ సూచించింది.
రాష్ట్ర విపత్తుల నిర్వహణ సంస్థ (APSDMA) అప్రమత్తంగా ఉండి, NDRF, SDRF బృందాలను సిద్ధంగా ఉంచింది. అధిక వర్షపాతం ఉండే ప్రాంతాల్లో నివాసితులకు మొబైల్ హెచ్చరిక సందేశాలు పంపడం జరుగుతోంది. ముఖ్యమంత్రి ఆదేశాల మేరకు, జన, ఆస్తి నష్టం జరగకుండా అధికారులు చర్యలు తీసుకుంటున్నారు. ప్రజలు వాతావరణ శాఖ సూచనలను పాటించి, అప్రమత్తంగా ఉండాలని కోరుతున్నారు.
