ఆసియా కప్ (Asia Cup) 2025లో భాగంగా భారత్ (India), యూఏఈ (UAE) మధ్య జరగనున్న మ్యాచ్‌పై మాజీ క్రికెటర్ అజయ్ జడేజా (Ajay Jadeja) సంచలన వ్యాఖ్యలు చేశారు. దుబాయ్‌ (Dubai) వేదికగా రాత్రి 8 గంటలకు ప్రారంభం కానున్న ఈ మ్యాచ్‌లో స్టార్ పేసర్ జస్ప్రీత్ బుమ్రాను ఆడించొద్దని ఆయన సూచించారు. ఒకవేళ అతడిని ఆడిస్తే తాను స్ట్రైక్ చేస్తానని జడేజా స్పష్టం చేశారు.
జడేజా వ్యాఖ్యల సారాంశం:
బుమ్రాను (Bumrah) జాగ్రత్తగా చూసుకోవాలి: “యూఏఈతో మ్యాచ్‌లో బుమ్రాను ఆడించాల్సిన అవసరం ఏముంది? అతడిని అత్యంత జాగ్రత్తగా చూసుకోవాలి. యూఏఈ జట్టుని తక్కువ చేయడం లేదు, కానీ బుమ్రాను మనం రక్షించుకోవాలి. లేదంటే ఇంకెందుకు?” అని జడేజా ప్రశ్నించారు.
“భారత్ టీ20 ప్రపంచకప్ గెలిచిన జట్టు. యూఏఈతో మ్యాచ్‌లో బుమ్రాను ఆడిస్తే నేను స్ట్రైక్ చేస్తా. ఈ విషయంలో నేను పూర్తి స్పష్టతతో ఉన్నా” అని సోనీ స్పోర్ట్స్ నెట్‌వర్క్‌లో జడేజా అన్నారు.
బుమ్రా గాయం నేపథ్యం:
ఈ ఏడాది ప్రారంభంలో ఆస్ట్రేలియా పర్యటనలో బుమ్రా వెన్ను గాయం తిరగబెట్టడంతో ఛాంపియన్స్ ట్రోఫీ 2025కు దూరమయ్యాడు. ఆసియా కప్‌లో కూడా అతడు ఆడతాడా లేదా అనే అనుమానాలు వ్యక్తమైనప్పటికీ, తాను ఆడతానని సెలెక్టర్లకు బుమ్రా చెప్పినట్లు సమాచారం. టీ20 మ్యాచ్‌లు కాబట్టి టోర్నీ మొత్తం ఆడే అవకాశాలు ఉన్నాయి.
