ప్రపంచ టెస్ట్ ఛాంపియన్‌షిప్ (WTC) 2025–27 సైకిల్‌లో ఆస్ట్రేలియా తన ఆధిపత్యాన్ని కొనసాగిస్తోంది. దక్షిణాఫ్రికాతో డర్బన్‌లోని కింగ్స్‌మీడ్ వేదికగా జరిగిన తొలి టెస్టులో ఆసీస్ 214 పరుగుల భారీ తేడాతో విజయం సాధించింది. ఈ విజయంతో మూడు టెస్టుల సిరీస్‌లో 1-0 ఆధిక్యంలోకి దూసుకెళ్లింది. మెట్ రెన్‌షా అద్భుత బ్యాటింగ్, జోష్ హేజిల్‌వుడ్ పదునైన బౌలింగ్ ఆసీస్ విజయానికి ప్రధాన కారణాలుగా నిలిచాయి. ఈ గెలుపుతో ఆస్ట్రేలియా ఖాతాలో మరో 12 డబ్ల్యూటీసీ పాయింట్లు చేరాయి.
డబ్ల్యూటీసీ పట్టికలో ప్రస్తుతం ఆస్ట్రేలియా 81.82 శాతం పాయింట్లతో అగ్రస్థానంలో కొనసాగుతోంది. 72.22 శాతంతో న్యూజిలాండ్ రెండో స్థానంలో ఉంది. తొలి టెస్టులో ఓటమితో దక్షిణాఫ్రికా (60) మూడో స్థానానికి పరిమితమైంది. 55.56 శాతం పాయింట్లతో బంగ్లాదేశ్ నాలుగో స్థానంలో ఉండగా.. భారత్ 51.52 శాతంతో ఐదో స్థానంలో ఉంది. ఇంగ్లాండ్ (38.54), శ్రీలంక (33.33), వెస్టిండీస్ (20.83), పాకిస్థాన్ (4.63) తర్వాతి స్థానాల్లో ఉన్నాయి. డబ్ల్యూటీసీ లీగ్ దశ ముగిసే సమయానికి పాయింట్ల శాతంలో అగ్రస్థానంలో నిలిచే రెండు జట్లు 2027 ప్రపంచ టెస్ట్ ఛాంపియన్‌షిప్ ఫైనల్‌కు అర్హత సాధిస్తాయి. దీంతో రాబోయే టెస్టుల్లో ప్రతి జట్టుకూ పాయింట్లు కీలకం కానున్నాయి. ముఖ్యంగా ఐదవ స్థానంలో ఉన్న టీమిండియా.. ప్రతి మ్యాచ్ గెలవాల్సి ఉంటుంది.
