ప్రతీ ఏడాది సంక్రాంతి పండుగ సందర్భంగా పెద్ద మొత్తంలో సెలవులు ప్రకటించడం సాంప్రదాయంగా వ‌స్తున్న‌దే. ఈసారి విద్యాశాఖ నిర్ణయాలు, కొత్త మార్పుల కారణంగా విద్యార్థులు, ఉపాధ్యాయులు, తల్లిదండ్రులు తాము అనుకున్న ప్లాన్‌లను సవరించుకోవాల్సి వస్తోంది.
తెలంగాణలో సెలవుల ఖరారు
తెలంగాణ విద్యాశాఖ సంక్రాంతి సెలవులను స్పష్టంగా ప్రకటించింది. అన్ని ప్రభుత్వ, ప్రైవేట్ పాఠశాలలు మరియు కళాశాలలకు జనవరి 13 నుండి 17 వరకు ఐదు రోజుల పాటు సెలవులు ఉంటాయని స్పష్టం చేసింది. ఈ సెలవులు 18న పాఠశాలలు మళ్లీ ప్రారంభం కానున్నాయి. అదనంగా, జనవరి 11వ తేదీ రెండో శనివారం, 12వ తేదీ ఆదివారం కావడంతో ఆ రెండు రోజులు కూడా సెలవులుగా చేరాయి.
ఆ మూడు రోజుల ప్రభావం..
ఇటీవల డిసెంబర్ చివరి వారంలో క్రిస్మస్ పండుగ, బాక్సింగ్ డే, మాజీ ప్రధాని మన్మోహన్ సింగ్ మరణానికి ప్రకటించిన సెలవులతో విద్యార్థులకు అదనంగా మూడు రోజుల సెలవులు దక్కాయి. దీని ప్రభావం సంక్రాంతి సెలవులపై లేదు, కానీ విద్యార్థులకు సుదీర్ఘ విశ్రాంతి లభించినట్టే.
సెలవుల తర్వాత పరీక్షల షెడ్యూల్
సెలవుల అనంతరం విద్యార్థులకు అసెస్‌మెంట్ పరీక్షలు నిర్వహించనున్నారు. పదో తరగతి విద్యార్థుల కోసం జనవరి 29లోగా, 1 నుంచి 9వ తరగతి విద్యార్థుల కోసం ఫిబ్రవరి 28లోగా పరీక్షలు నిర్వహించాలని విద్యాశాఖ ఇప్పటికే ఆదేశాలు జారీ చేసింది.
