హైదరాబాద్ నగరానికి తాగునీటి సరఫరా (Hyderabad Drinking Water) అంశంపై ముఖ్యమంత్రి రేవంత్ రెడ్డి (CM Revanth Reddy) సమీక్ష నిర్వహించారు. ఇంటిగ్రేటెడ్ కమాండ్ కంట్రోల్ సెంటర్‌లో హైదరాబాద్ జల మండలి బోర్డు (Jala Mandali Board) అధికారులతో నిర్వహించిన ఈ సమావేశంలో నగర వినియోగదారులకు సమర్థవంతమైన నీటి సరఫరా కోసం ప్రత్యేక ప్రణాళికలపై చర్చ జరిగింది. వేసవి కాలం దృష్టిలో ఉంచుకుని తీసుకోవాల్సిన చర్యలపై, మౌలిక వసతుల మెరుగుదల కోసం వీలైన అన్ని వ్యూహాలు రూపొందించమని సీఎం అధికారులను ఆదేశించారు.
గోదావరి నీటి వినియోగం, మూసీ ప్రక్షాళనపై చర్చ
మూసీ నది ప్రక్షాళనలో భాగంగా గోదావరి నీటిని హైదరాబాద్‌కు తరలించడం, దాని వినియోగాన్ని మరింత సమర్థవంతంగా చేయడం వంటి అంశాలను సమావేశంలో ముఖ్యంగా ప్రస్తావించారు. జంటనగరాల్లో నీటి అవసరాలను తీర్చేందుకు తీసుకోవాల్సిన కార్యాచరణపై ప్రాముఖ్యత ఇచ్చారు. సమావేశానికి సీఎం సలహాదారు వేం. నరేందర్ రెడ్డి, ప్రభుత్వ ప్రధాన కార్యదర్శి శాంతికుమారి, ఇతర ఉన్నతాధికారులు హాజరయ్యారు.
