ఉగాండాలో బుండిబుగ్యో జిల్లాలో ఓ వింత వ్యాధి భయపెడుతోంది. ఇది ముఖ్యంగా మహిళలు, బాలికల్లో ఎక్కువగా కనిపిస్తోంది. దీంతో స్థానిక ప్రజలను తీవ్ర ఆందోళనకు గురిచేస్తోంది. డింగా డింగా ఫీవర్ అనే ఈ వ్యాధి కారణంగా ఇప్పటివరకు 400 మందికి పైగా ప్రభావితమయ్యారని ఉగాండా ఆరోగ్యశాఖ అధికారులు తెలిపారు. అయితే, సంతోషకరమైన విషయం ఏమిటంటే, ఈ వ్యాధి కారణంగా ఇప్పటివరకు మరణాలు నమోదవ్వలేదు.
డింగా డింగా ఫీవర్ లక్షణాలు
ఈ వ్యాధి ప్రభావంతో శరీరంలో తీవ్రమైన వణుకు మొదలవుతుంది. చేతులు, కాళ్లు ఇలా వణుకుతుండటం వల్ల వారికి నడవడం కూడా కష్టమవుతుంది. ఈ వణుకు వ్యాధిసోకిన వారు “డ్యాన్స్ చేస్తున్నట్లు” కనిపించేలా చేస్తుంది. వ్యాధి సోకినవారికి జ్వరం, తలనొప్పి, దగ్గు, ముక్కు కారటం, శరీర నొప్పులు ఉంటాయి.
2023 ప్రారంభంలో ఈ వ్యాధిని మొదటిసారిగా గుర్తించారు. వ్యాధి గురించి పూర్తి వివరాలు తెలియనప్పటికీ, దీనిపై పరిశోధనలు కొనసాగుతున్నాయి. ఆరోగ్య నిపుణులు 1518లో ఫ్రాన్స్లో ప్రబలిన ‘డ్యాన్సింగ్ ప్లేగు’తో ఈ వ్యాధిని పోలుస్తున్నారు. అప్పుడు కూడా బాధితులు అనియంత్రిత వణుకుతో రోజుల తరబడి బాధపడ్డారు, ఇది మరణాలకు కూడా దారి తీసింది.
బాధితురాలి అనుభవం
తాజాగా డింగా డింగా వ్యాధి నుంచి కోలుకున్న ఓ 18 ఏళ్ల బాధితురాలు మాట్లాడుతూ.. “నాకు చాలా బలహీనంగా అనిపించింది. నడవడానికి ప్రయత్నించినప్పుడు నా కంట్రోల్లో ఉండటం లేదు. కాళ్లు, చేతులు నా నియంత్రణలో లేవు. వారం రోజులు ఆసుపత్రిలో ఉండి చికిత్స పొందాను. ఇప్పుడు బాగున్నాను” అని చెప్పింది.
