నేడు (నవంబర్ 5, 2025) కింగ్ కోహ్లీ పుట్టిన రోజు. ఢిల్లీలో జన్మించిన విరాట్ కోహ్లీ 37 ఏళ్లు పూర్తి చేసుకున్న సందర్భంగా ప్రపంచవ్యాప్తంగా అభిమానులు, క్రికెటర్ల నుంచి శుభాకాంక్షలు వెల్లువెత్తాయి. ఈ సందర్భంగా టీమిండియా టాప్ బ్యాటర్ విరాట్ కోహ్లీ, బాలీవుడ్ నటి అనుష్క శర్మ గురించి ఒక ఆసక్తికర విషయం తెలుసుకుందాం.
ప్రేమించి పెళ్లి చేసుకున్న ఈ స్టార్ కపుల్, 2017 డిసెంబర్ 11న ఇటలీలో డెస్టినేషన్ వెడ్డింగ్ ద్వారా ఒక్కటయ్యారు. వీరి పెళ్లి తర్వాతే డెస్టినేషన్ వెడ్డింగ్ కాన్సెప్ట్ బాగా ప్రాచుర్యం పొందింది. అయితే, ఇంత అన్యోన్యంగా ఉండే ఈ జంట గతంలో విడిపోవడానికి సిద్ధమయ్యారనే విషయం చాలా మందికి తెలియదు.
పెళ్లికి ముందు విరాట్, అనుష్కల బంధంలో అనేక ఇబ్బందులు ఎదురయ్యాయి. 2016వ సంవత్సరంలో వీరిద్దరూ విడిపోయారని అప్పట్లో వార్తలు పెద్ద ఎత్తున వచ్చాయి. అయితే, కొంతకాలం తర్వాత ఈ జంట తిరిగి కలుసుకున్నారు. మొదట్లో అనుష్క సోదరుడు కర్ణేష్ శర్మ వీరిని కలిపేందుకు ప్రయత్నించినట్లు వార్తలు వచ్చినా, చివరకు ‘సుల్తాన్’ చిత్రంలో అనుష్క సహనటుడు అయిన సల్మాన్ ఖాన్ ఈ ప్రేమ జంటను తిరిగి కలపడంలో ప్రధాన పాత్ర పోషించాడని వెల్లడైంది. నేడు వీరి బంధం విడదీయరానిదిగా మారి, ఆదర్శ జంటగా నిలిచారు.
