తెలంగాణ (Telangana) రాష్ట్రంలో ‘మార్వాడీ గో బ్యాక్’ (‘Marwadi Go Back) అనే నినాదం ఒక సామాజిక, రాజకీయ ఉద్యమంగా రూపుదిద్దుకుంది. సోషల్ మీడియాలో మొదలైన ఈ నిరసన పిలుపు క్రమంగా రాష్ట్రంలోని పలు జిల్లాలకు విస్తరించింది. మార్వాడీ వ్యాపారుల వల్ల స్థానిక వ్యాపారుల ఉపాధి అవకాశాలు దెబ్బతింటున్నాయని ఆరోపిస్తూ చాలా చోట్ల దుకాణదారులు బంద్‌కు మద్దతు తెలిపారు. ఈ బంద్‌కు ఉస్మానియా యూనివర్సిటీ జాయింట్ యాక్షన్ కమిటీ (ఓయూ జేఏసీ)(OU JAC) ఆగస్టు 22న పిలుపునిచ్చింది.
ఉద్యమానికి కారణాలు, రాజకీయ మద్దతు
స్థానిక వ్యాపారుల ఆరోపణల ప్రకారం, తెలంగాణలో మార్వాడీలు ఒక గ్రూపుగా ఏర్పడి తమ వ్యాపారాలను దెబ్బతీస్తున్నారని, స్థానికుల ఎదుగుదలకు అడ్డుపడుతున్నారని తెలుస్తోంది. ఇతర ప్రాంతాల నుంచి వచ్చిన మార్వాడీలు తమపై దాడులకు పాల్పడుతున్నారని కూడా వ్యాపారులు ఆరోపిస్తున్నారు. ఈ నేపథ్యంలోనే ఈ ఉద్యమం మరింత తీవ్రమైంది.
‘మార్వాడీ గో బ్యాక్’ ప్రచారాన్ని నిర్వహిస్తున్న పృథ్విరాజ్ యాదవ్ (Prithviraj Yadav) అనే వ్యక్తిని పోలీసులు అరెస్టు చేయడంతో ఈ వివాదం కొత్త మలుపు తిరిగింది. ఈ అరెస్ట్‌పై వివిధ రాజకీయ వర్గాల నుంచి భిన్నమైన స్పందనలు వచ్చాయి. బీజేపీ నేతలు బండి సంజయ్, రాంచందర్ రావు, మరియు రాజా సింగ్ వంటివారు మార్వాడీలకు మద్దతుగా నిలిచారు. ఈ విషయం ప్రస్తుతం తెలంగాణలో ఒక ప్రధాన రాజకీయ అంశంగా మారి, విస్తృత చర్చకు దారితీసింది.
