ఢిల్లీ-ఎన్‌సీఆర్ (Delhi-NCR) ప్రాంతంలోని వీధి కుక్కలను (Street Dogs) ఎనిమిది వారాల్లోగా ఆశ్రయాలకు తరలించాలన్న సుప్రీంకోర్టు (Supreme Court) ఆదేశంపై నటి (Actress) సదా (Sadaa) తీవ్ర ఆవేదన వ్యక్తం చేశారు. రేబిస్ కారణంగా ఒక బాలిక మరణించిన ఘటన నేపథ్యంలో సుప్రీంకోర్టు ఈ తీర్పును వెలువరించింది. ఈ నిర్ణయాన్ని సదా “కుక్కల ఊచకోత”గా అభివర్ణించారు.
సదా మాట్లాడుతూ, ఈ పరిస్థితికి ప్రభుత్వాలు, స్థానిక సంస్థల అసమర్థతే కారణమని ఆరోపించారు. “లక్షల కుక్కలకు ఆశ్రయాలు కల్పించడంలో, టీకాలు వేయించడంలో వారు విఫలమయ్యారు” అని ఆమె అన్నారు. జంతు జనన నియంత్రణ (ABC) కార్యక్రమాన్ని సరిగ్గా అమలు చేసి ఉంటే ఈ దుస్థితి తలెత్తి ఉండేది కాదని ఆమె అభిప్రాయపడ్డారు.
కొంతమంది డాగ్ లవర్స్‌ను కూడా ఆమె విమర్శించారు. “కేవలం జాతి కుక్కలను కొనుగోలు చేసి, వీధి కుక్కలను పట్టించుకోకపోవడం వల్ల ఈ సమస్య మరింత తీవ్రమైంది. మీ కారణంగా వీధి కుక్కలు వీధుల్లోనే ఉండిపోయాయి” అని ఆమె ఆవేదన వ్యక్తం చేశారు.
“నాకేం చేయాలో తెలియడం లేదు. ఏ అధికారులను సంప్రదించాలో, ఎక్కడికి వెళ్లి నిరసన తెలపాలో నాకు తెలియడం లేదు. కానీ ఇది నన్ను లోపల చంపేస్తోంది. ఇది అస్సలు సరైనది కాదు. మన పట్ల, మన దేశం పట్ల నాకు సిగ్గుగా ఉంది. ఈ తీర్పు ఇచ్చే ముందు ఆలోచించని వారి పట్ల సిగ్గుపడుతున్నాను. దయచేసి ఈ నిర్ణయాన్ని వెనక్కి తీసుకోండి,” అంటూ ఆమె కన్నీళ్లతో అభ్యర్థించారు.
సదా మాత్రమే కాకుండా, జాన్వీ కపూర్, వరుణ్ ధావన్, చిన్మయి శ్రీపాద, వరుణ్ గ్రోవర్, వీర్ దాస్‌ వంటి పలువురు సినీ ప్రముఖులు సోషల్ మీడియాలో ఈ తీర్పును వ్యతిరేకిస్తూ పోస్టులు పెట్టారు. ఈ నిర్ణయాన్ని “కుక్కలకు మరణశిక్ష”గా అభివర్ణించారు. రేబిస్ మరణాలు, కుక్కల దాడులు పెరగడం వల్లే సుప్రీంకోర్టు ఈ చర్య తీసుకుందని, దీనిని అడ్డుకునే వారిపై కఠిన చర్యలు తీసుకుంటామని హెచ్చరించింది.
