బంగాళాఖాతం (Bay of Bengal)లో కొనసాగుతున్న ఉపరితల ద్రోణి ప్రభావం (Surface Trough Effect) కారణంగా తెలంగాణ రాష్ట్రవ్యాప్తంగా వర్షాలు విస్తరిస్తున్నాయి. ఈ ద్రోణి మరింత బలపడే అవకాశం ఉన్నందున వాతావరణ శాఖ (IMD) ఎల్లో అలర్ట్ (Yellow Alert) జారీ చేసింది. నిన్న మధ్యాహ్నం నుంచి అనేక ప్రాంతాల్లో మోస్తరు నుంచి భారీ వర్షాలు కురిసినట్లు రికార్డ్ కాగా, ఈ రోజు కూడా ఇదే వాతావరణ పరిస్థితులు కొనసాగే అవకాశం ఉందని అంచనా.
ఈ జిల్లాల్లో భారీ నుంచి అతి భారీ వర్షాలు
సూర్యాపేట, నల్లగొండ, ఖమ్మం, మహబూబాబాద్, భద్రాద్రి-కొత్తగూడెం, రంగారెడ్డి, మహబూబ్ నగర్, వనపర్తి, నాగర్ కర్నూల్ జిల్లాలో భారీ వర్షాలు కుర‌వ‌నున్న‌ట్లుగా తెలిపారు. సాయంత్రం నుంచి రాత్రివేళ ఈ జిల్లాల్లో భారీ నుంచి అతి భారీ వర్షాలు కురిసే అవకాశం ఉంది. మిగిలిన జిల్లాల్లోనూ మోస్తరు నుంచి భారీ వర్షాలు పడవచ్చని సూచించారు.
హైదరాబాద్ ప్రజలకు కీలక సూచన
గురువారం సాయంత్రం నుంచి అర్ధరాత్రి వరకు హైదరాబాద్ నగరంలో (Hyderabad City) కుండపోత వర్షం కురిసింది. కొన్ని ప్రాంతాల్లో క్లౌడ్ బరస్ట్ (Cloud Burst) స్థాయిలో వర్షం పడటంతో రోడ్లు చెరువుల్లా మారాయి, ట్రాఫిక్ జామ్‌లు (Traffic Jams) కిలోమీటర్ల మేర ఏర్పడ్డాయి. అయితే, ఈ రోజు ఉదయం ఎక్కువ ప్రాంతాల్లో పొడి వాతావరణం ఉన్నప్పటికీ, సాయంత్రం నుంచి రాత్రి వరకు మోస్తరు నుంచి భారీ వర్షాలు పడే అవకాశం ఉంది. వాతావరణ శాఖ ప్రజలకు తమ పనులు ముందుగానే ముగించుకుని సురక్షితంగా ఉండాలని సూచించింది.
