రాఘవ లారెన్స్ (Raghava Lawrence).. నటుడిగా, కొరియోగ్రాఫర్‌గా, దర్శకుడిగా, నిర్మాతగా దక్షిణాది సినిమా ప్రపంచంలో తనదైన ముద్ర వేసుకున్న వ్యక్తి. హిట్టు, ప్లాపులతో సంబంధం లేకుండా వరుస సినిమాలతో ప్రేక్షకులను అలరిస్తూనే, తెర వెనుక ఎంతో మందికి అండగా నిలుస్తూ తన గొప్ప మనసును చాటుకుంటున్నారు.
లారెన్స్ సేవా దృక్పథం
కష్టపడి పైకి వచ్చిన రాఘవ లారెన్స్, తన డ్యాన్స్‌తో ఇండస్ట్రీనే ఒక ఊపు ఊపారు. స్టార్ హీరోలకు కొరియోగ్రాఫర్‌గా పనిచేశారు. కెరీర్ తొలినాళ్లలో చిన్న చిన్న పాత్రలు పోషించి, ఆ తర్వాత హీరోగా అలరించారు. తెలుగు, తమిళ భాషల్లో అనేక సినిమాల్లో నటించి, సెన్సేషనల్ డ్యాన్స్ మూమెంట్స్‌ను తన ఖాతాలో వేసుకున్నారు. ఇటీవల ‘జిగర్తాండ డబుల్ ఎక్స్’, ‘చంద్రముఖి 2’, ‘రుద్రన్’ వంటి సినిమాలతో నటుడిగా ప్రేక్షకులను అలరించారు.
సినిమాలతో బిజీగా ఉన్నప్పటికీ, లారెన్స్ సామాజిక సేవలోనూ ముందుంటారు. ఇప్పటికే ఎంతో మంది చిన్నారులకు, పేదలకు తనవంతు సాయం చేసిన సంగతి తెలిసిందే. తన ఫౌండేషన్ (Foundation) ద్వారా కష్టాల్లో ఉన్న పేదలకు, విద్యార్థులకు నిరంతరం సహాయం అందిస్తున్నారు.
ముగ్గురు చిన్నారుల ఆవేదనకు స్పందన
తాజాగా మరోసారి లారెన్స్ తన గొప్ప మనసు (Great Heart)ను చాటుకున్నారు. సోషల్ మీడియాలో ఒక వీడియోను పోస్ట్ చేశారు. ఆ వీడియోలో ముగ్గురు చిన్నారులు తమ తల్లికి ఆరోగ్యం బాగోలేదని, దయచేసి ప్రభుత్వం ఆదుకోవాలని విజ్ఞప్తి చేశారు. వారి వీడియో చూసి లారెన్స్ చలించిపోయారు.
ఈ వీడియో తన వరకు చేర్చిన వారికి ధన్యవాదాలు తెలుపుతూ, లారెన్స్ వెంటనే స్పందించారు. “మీరు ప్రభుత్వాన్ని సాయం కోరారు కాబట్టి, వారు త్వరలోనే స్పందించి మిమ్మల్ని ఖచ్చితంగా ఆదుకుంటారు. మీకు సహాయం చేయడానికి నేను నా వంతు కృషి చేస్తాను. నా బృందం ఈరోజే మిమ్మల్ని కలుసుకుంటుంది” అని సోషల్ మీడియాలో పోస్ట్ చేశారు. లారెన్స్ చేసిన ఈ మంచి పనిపై నెటిజన్స్ ప్రశంసలు కురిపిస్తున్నారు. కొందరు ఆయన్ను ‘కలియుగ కర్ణుడు’ అంటూ కామెంట్స్ చేస్తున్నారు.
