టీమిండియా (Team India)కు చిరస్మరణీయ విజయాలను అందించిన రోహిత్ శర్మ (Rohit Sharma), విరాట్ కోహ్లీ (Virat Kohli).. ఇప్పటికే టీ20, టెస్ట్ ఫార్మాట్ల (Test Formats) నుంచి రిటైర్ (Retired) అయ్యారు. అయితే, వన్డే క్రికెట్‌లో మాత్రం వారి ఆధిపత్యం కొనసాగుతోంది. ఇద్దరూ 50 ఓవర్ల ఫార్మాట్‌ (Format)లో ఆడాలని నిర్ణయించుకున్నారు. వచ్చే నెలలో జరగాల్సిన బంగ్లాదేశ్ (Bangladesh) పర్యటనలో ఈ ఇద్దరు స్టార్ ప్లేయర్లు ఆడతారని భావిస్తున్నారు. కానీ, ఈ పర్యటన జరుగుతుందా లేదా అన్నదే ఇప్పుడు పెద్ద ప్రశ్నగా మారింది.
బంగ్లాదేశ్ పర్యటనపై అనిశ్చితి
ఆగస్టులో భారత జట్టు (India Team) బంగ్లాదేశ్ (Bangladesh)లో పర్యటిస్తుందో లేదో ఇంకా స్పష్టంగా తెలియదు. భారత ప్రభుత్వం నుంచి అనుమతి లభించకపోవడమే ఈ సందిగ్ధానికి కారణం. బంగ్లాదేశ్ క్రికెట్ బోర్డు (BCB) అధ్యక్షుడు అమీనుల్ ఇస్లాం (Aminul Islam) మాట్లాడుతూ, బీసీసీఐ (BCCI) ఇంకా ఈ పర్యటనను ధృవీకరించలేదని, భారత ప్రభుత్వం నుంచి గ్రీన్ సిగ్నల్ వచ్చిన తర్వాతే బీసీసీఐ(BCCI) తుది నిర్ణయం తీసుకుంటుందని తెలిపారు.
అయితే, బీసీసీఐతో చర్చలు కొనసాగుతున్నాయని, పర్యటన జరుగుతుందని తాను ఆశాభావంతో ఉన్నానని అమీనుల్ ఇస్లాం అన్నారు. ఈ సిరీస్ ఆగస్టు 17 నుండి ప్రారంభం కావాల్సి ఉంది, దీనికి భారత ప్రభుత్వ ఆమోదం మాత్రమే అవసరం.
మ్యాచ్‌లు రద్దవుతాయా?
ఈ పర్యటనలో భాగంగా టీమిండియా ముందుగా మూడు వన్డేలు, ఆ తర్వాత మూడు టీ20 మ్యాచ్‌లు ఆడాల్సి ఉంది. రోహిత్, విరాట్ వన్డే ఫార్మాట్‌లో ఆడుతున్నందున, ఈ పర్యటనలో పాల్గొనే అవకాశం ఉంది. కానీ, భారత ప్రభుత్వం నుంచి అనుమతి రాకపోతే, రోహిత్, విరాట్ ఆడాల్సిన ఆ మూడు వన్డే మ్యాచ్‌లు రద్దు కావడమే కాకుండా, మొత్తం పర్యటన కూడా రద్దయ్యే ప్రమాదం ఉంది.
ఒకవేళ ఆగస్టులో భారత జట్టు రాలేకపోతే, తదుపరి అందుబాటులో ఉన్న విండోలో బంగ్లాదేశ్‌లో పర్యటిస్తామని బీసీసీఐ హామీ ఇచ్చిందని బీసీబీ అధ్యక్షుడు తెలిపారు. ఈ పర్యటనకు సంబంధించి ప్రస్తుతం ఉన్న “ఇఫ్స్ అండ్ బట్స్” పరిస్థితి ఎందుకు ఏర్పడిందో తనకు తెలియదని ఆయన అన్నారు.
