ఇంగ్లండ్ (England) టీ20 బ్లాస్ట్‌ (T20 Blast)లో నాటింగ్‌హామ్‌షైర్ యువ స్పిన్నర్ ఫర్హాన్ అహ్మద్ (Farhan Ahmad) సంచలనం సృష్టించాడు. శుక్రవారం ట్రెంట్‌బ్రిడ్జ్ (Trent Bridge) వేదికగా లంకాషైర్ (Lancashire)తో జరిగిన మ్యాచ్‌లో 17 ఏళ్ల ఫర్హాన్ అహ్మద్ హ్యాట్రిక్ (Hat-Trick) వికెట్ల (Wickets)తో చెలరేగిపోయాడు. లంకాషైర్ ఇన్నింగ్స్ 20వ ఓవర్‌లో బౌలింగ్ చేసిన ఫర్హాన్, ఆఖరి మూడు బంతుల్లో వరుసగా ల్యూక్ వుడ్, టామ్ ఆస్పిన్‌వాల్, మిచెల్ స్టాన్లేలను పెవిలియన్‌కు పంపాడు.
టీ20 క్రికెట్‌లో నాటింగ్‌హామ్‌షైర్ తరఫున తొలి హ్యాట్రిక్
ఈ హ్యాట్రిక్‌తో ఫర్హాన్ అహ్మద్ ఖాతాలో తొలి హ్యాట్రిక్ చేరింది. అంతేకాకుండా, టీ20 క్రికెట్‌లో నాటింగ్హామ్ (Nottinghamshire)షైర్ తరఫున హ్యాట్రిక్ సాధించిన తొలి ఆటగాడిగా కూడా అతడు రికార్డు సృష్టించాడు. ఈ ఫర్హాన్ మరెవరో కాదు, ఇంగ్లండ్ స్పిన్నర్ రెహాన్ అహ్మద్ తమ్ముడే.
గతేడాది జరిగిన అండర్-19 వరల్డ్‌కప్‌లో కూడా ఫర్హాన్ ఇంగ్లండ్ తరఫున ఆడాడు. లంకాషైర్‌తో జరిగిన ఈ మ్యాచ్‌లో ఫర్హాన్ తన నాలుగు ఓవర్ల కోటాలో కేవలం 25 పరుగులు మాత్రమే ఇచ్చి ఐదు వికెట్లు పడగొట్టాడు. ఈ యువ సంచలనం ఇప్పటికే నాటింగ్హామ్ తరఫున ఫస్ట్ క్లాస్ క్రికెట్‌లో కూడా అరంగేట్రం చేశాడు. తన డెబ్యూ మ్యాచ్‌లోనే 7 వికెట్లు పడగొట్టి తన సత్తా చాటాడు.
మ్యాచ్ వివరాలు
ఈ మ్యాచ్ విషయానికి వస్తే, టాస్ గెలిచి తొలుత బ్యాటింగ్‌కు దిగిన లంకాషైర్ 126 పరుగులకు ఆలౌట్ అయింది. నాటింగ్హామ్ బౌలర్లలో ఫర్హాన్‌తో పాటు మోంట్‌గోమేరీ, ప్యాటర్సన్-వైట్ తలా రెండు వికెట్లు పడగొట్టారు. అనంతరం 127 పరుగుల లక్ష్యాన్ని నాటింగ్హామ్ 6 వికెట్లు కోల్పోయి చేధించింది.
