యెమెన్‌ (Yemen)లో మరణశిక్ష ఎదుర్కొంటున్న కేరళ నర్సు (Kerala Nurse) నిమిష ప్రియ (Nimisha Priya)కు కాస్త ఊరట లభించింది. జులై 16న అమలు కావాల్సిన ఆమె మరణశిక్ష (Death Sentence)ను యెమెన్‌ అధికారులు చివరి క్షణంలో వాయిదా (Postponement) వేసినట్లు భారత విదేశాంగ శాఖ (Indian Ministry of External Affairs) వర్గాలు వెల్లడించాయి.
వాయిదాకు కారణం, ‘బ్లడ్ మనీ’ చర్చలు
నిమిష కుటుంబం, బాధితుడి కుటుంబం మధ్య పరస్పర అంగీకారంతో కేసును పరిష్కరించుకోవడానికి మరింత సమయం ఇచ్చేందుకు భారత ప్రభుత్వం చేస్తున్న ప్రయత్నాలు ఫలించాయి. స్థానిక జైలు అధికారులు, ప్రాసిక్యూటర్ కార్యాలయంతో నిరంతరం సంప్రదింపులు జరిపి ఈ వాయిదాకు అంగీకారం పొందినట్లు విదేశాంగ శాఖ తెలిపింది.
ఈ కేసులో ‘బ్లడ్ మనీ’ (Blood Money) (క్షమాపణ సొమ్ము) తీసుకునేలా బాధితుడి కుటుంబాన్ని ఒప్పించేందుకు మత గురువు కాంతాపురం (Kanthapuram) ఏపీ అబూబకర్ ముస్లియార్ (AP Abubacker Musliyar) జరుపుతున్న చర్చలు సానుకూలంగా ఉన్నాయని సమాచారం. బాధితుడి కుటుంబానికి ఒక మిలియన్ డాలర్లు (దాదాపు రూ.8.6 కోట్లు) ఇచ్చేందుకు నిమిష ప్రియ కుటుంబం సిద్ధమైంది. ఇందుకు వారు అంగీకరిస్తే, నిమిష ప్రియకు మరణశిక్ష తప్పే అవకాశం ఉంది.
అసలు కేసు నేపథ్యం
నిమిష ప్రియ 2008లో నర్సుగా యెమెన్‌కు వెళ్లింది. అక్కడ క్లినిక్ ప్రారంభించేందుకు తలాల్ అదిబ్ మెహదిని వ్యాపార భాగస్వామిగా చేసుకుంది. ప్రియ భారత్‌కు వెళ్లిన సమయంలో మెహది ఆమెను వేధించి, డబ్బు లాగి, పాస్‌పోర్ట్‌ను లాక్కున్నాడని ప్రియ కుటుంబం ఆరోపించింది. 2016లో పోలీసులకు ఫిర్యాదు చేసినా ప్రయోజనం లేకపోవడంతో, 2017లో మెహదికి మత్తుమందు ఇచ్చి పాస్‌పోర్ట్ తీసుకోవాలనుకుంది. అయితే, డోస్ ఎక్కువవడంతో మెహది మరణించాడు. ఆ తర్వాత మృతదేహాన్ని వాటర్ ట్యాంక్‌లో పారేసి, సౌదీకి పారిపోతుండగా సరిహద్దుల్లో నిమిష ప్రియను అరెస్టు చేశారు.
